Vera Kım: Volonterlik is-áreket bir rettik bastama emes, turaqty qoǵamdyq ınstıtýt
PAVLODAR. KAZINFORM — Depýtattar Pavlodar oblysynyń qoǵamdyq uıymdarymen eriktiler qozǵalysyn damytý joldaryn talqylady, dep habarlaıdy Májilistiń baspasóz qyzmeti.
Májilis depýtattary Pavlodar óńiriniń belsendilerimen kezdesý ótkizip, azamattyq qoǵamdy damytýdaǵy volonterliktiń rólin talqylady. Іs-sharaǵa «AMANAT» partııasy fraktsııasynyń músheleri Vera Kım, Jarqynbek Amantaı jáne Nurjan Áshimbetov qatysty.
Ashyq áńgime formatynda ótken is-sharanyń taqyryby Memleket basshysy aıqyndap bergen memlekettik basymdyqtardy iske asyrýdaǵy eriktiler qozǵalysynyń mańyzyna arnaldy. Májilis depýtaty, Ulttyq volonterlik jeliniń jetekshisi Vera Kım elimizde volonterlik is-áreket bir rettik bastama emes, turaqty qoǵamdyq ınstıtýtqa aınalǵanyn atap ótti.
— Qazaqstandaǵy volonterlik — memlekettiń qoldaýymen júrgiziletin júıeli jumys. Prezıdentimiz volonterlik qozǵalys qoǵamdyq ómirdiń ajyramas bóligine aınalǵanyn birneshe ret atap ótti. Sondyqtan Qasym-Jomart Toqaevtyń bastamasymen BUU Bas Assambleıasy turaqty damý maqsatynda 2026 jyldy Halyqaralyq eriktiler jyly dep jarııalaý týraly qarar qabyldady. Bul — Qazaqstan men bizdiń eriktilerdiń jahandyq ornyqty damýǵa qosqan úlesiniń moıyndalýy, — dedi ol.
Májilismen Qazaqstannyń osy salada eleýli ınstıtýtsıonaldyq tájirıbesi bar ekenin eske saldy. Elimizde 2020 jyl Eriktiler jyly dep jarııalanǵanyn, bul eriktiler qozǵalysynyń damýyna qýatty serpin bergenin, volonterler qyzmetiniń zańnamalyq bazasy aıtarlyqtaı jańarǵanyn tilge tıek etti.
Depýtat Jarqynbek Amantaıuly «AMANAT» partııasy eń qıyn kezeńderde únemi halyqtyń janynan tabylyp júrgenin atap ótti. Ol 2022 jyly Ekibastuzdyń jylýmen jabdyqtaý júıesinde bolǵan apatty, 2024 jylǵy sý tasqynyn, 2022 jylǵy qyrkúıekte — Qostanaı oblysynda, 2023 jyly maýsymda — Abaı oblysynyń «Semeı ormany» orman rezervatynda bolǵan alapat órtterdiń saldaryn joıýǵa qatysqan eriktilerdi mysalǵa keltirdi. Osy oqıǵalardyń barlyǵynda partııanyń jastar halyqpen birge bolǵanyn, zardap shekkenderge kómek kórsetkenin aıtty.
Pavlodar oblysy boıynsha «Jas Ulan» biryńǵaı balalar men jasóspirimder uıymy volonterlik qozǵalysynyń úılestirýshisi Áıgerim Túsipbekova búginde óńirdiń árbir mektebinde volonterlik otrıadtar jumys isteıtinin aıtty. Oqýshylar ekologııalyq aktsııalarǵa qatysady, jalǵyzbasty zeınetkerlerge kómektesedi, sondaı-aq ózderiniń shyǵarmashylyq bastamalaryn júzege asyrady.
Volonterlik qozǵalysty odan ári damytýdy talqylaý barysynda qoǵamdyq uıymdardyń ókilderi kólik máselelerin sheshý kezinde ataýly qoldaý qajet ekenine nazar aýdardy. Volonterlik qyzmetti jumyspen nemese oqýmen ushtastyratyn belsendilerge yńǵaıly jaǵdaı jasaý úshin óńirlik front-ofısterdiń barynsha ıkemdi jumys kestesin qaraýdy usyndy.
Kezdesýde ortaǵa salynǵan usynystardy depýtattar zańnamalyq bazany jetildirýge baǵyttalǵan jumys barysynda qaraıtyn boldy.
Budan buryn sarapshy Elena Amreeva Kazinform tilshisine bergen suhbatynda elimizdegi eriktiler qozǵalysynyń ótkeni, búgini men bolashaǵy týraly jan-jaqty áńgimelep berdi.