Venstiń Erevanǵa sapary: AQSh pen Armenııa qarym-qatynasy jańa kezeńge ótti
ASTANA. KAZINFORM – AQSh vıtse-prezıdenti Djeı Dı Venstiń Armenııaǵa jasaǵan alǵashqy resmı sapary Erevan men Vashıngton arasyndaǵy qarym-qatynastyń aıtarlyqtaı jaqyndaǵanyn kórsetti, dep habarlaıdy VVS.
Sapar barysynda Vens Armenııa premer-mınıstri Nıkol Pashınıannyń maýsym aıynda ótetin saılaýǵa qatysýyn qoldaıtynyn bildirip, armıan armııasyna amerıkalyq barlaý maqsatyndaǵy drondar jetkiziletinin málimdedi.
Birlesken baspasóz máslıhatynda AQSh vıtse-prezıdenti Pashınıannyń óńirlik turaqtylyqty qamtamasyz etýge baǵyttalǵan ustanymyn atap ótti.
– Men Pashınıannyń aldaǵy saılaýy bar ekenin bilemin. Saılaý týraly tikeleı pikir bildirmeımin, biraq meniń qoldaýymnyń salmaǵy bolsa, ol bul qoldaýǵa laıyq. Sebebi ol Ázerbaıjanmen turaqty beıbitshilikti qamtamasyz etýge múmkindik beretin uzaq merzimdi áriptestik ornata biledi, – dedi Djeı Dı Vens.
Sapar aıasynda AQSh pen Armenııa arasynda ıadrolyq energetıka salasyndaǵy yntymaqtastyq jónindegi kelisimge qol jetkiziletini de jarııalandy. Bul qujat amerıkalyq ıadrolyq tehnologııalardy eksporttaýǵa jáne Armenııa aýmaǵynda shaǵyn modýldi ıadrolyq reaktorlar salýǵa jol ashýy múmkin.
Sonymen qatar amerıkalyq jáne armıandyq Firebird startapynyń Armenııada sýperkompıýter men data-ortalyq salý jobasyna qosymsha 4 mlrd dollar ınvestıtsııa salatyny belgili boldy. Osy maqsatta AQSh úkimeti taǵy 41 myń Nvidia chıpin satýǵa ruqsat bergen. Bul joba Armenııanyń IT-sektoryndaǵy eń iri ınvestıtsııa retinde baǵalanyp otyr.
Alaıda sapardaǵy eń mańyzdy jańalyq – armıan armııasyna amerıkalyq barlaý maqsatyndaǵy V-Bat úlgisindegi ushqyshsyz apparattardyń jetkizilýi. Jalpy quny 11 mln dollar bolatyn bul kelisim Armenııa tarıhyndaǵy alǵashqy amerıkalyq áskerı tehnıka jetkizilimi sanalady. Armenııa resmı túrde Reseıdiń odaqtasy bolyp qala otyryp, AQSh-pen strategııalyq áriptes mártebesine ıe jáne Eýroodaqqa qosylýdy maqsat etip otyr.
Vens pen Pashınıan Armenııa men Ázerbaıjan arasyndaǵy beıbit úderisti de talqylady. Kelissózderdegi sheshilmegen negizgi máselelerdiń biri – Bakýde qamaýda otyrǵan armıan azamattarynyń taǵdyry. AQSh vıtse-prezıdenti saparynyń kelesi baǵyty Ázerbaıjan bolatynyn aıtyp, bul máseleni Baký basshylyǵymen talqylaýdy josparlap otyrǵanyn jetkizdi.
Sarapshylardyń pikirinshe, Venstiń Pashınıanǵa ashyq qoldaý bildirýi Batys elderiniń Armenııadaǵy aldaǵy parlamenttik saılaýda biryńǵaı kandıdatqa toqtaǵanyn ańǵartady. Bul jaıt AQSh pen Eýropa elderi arasynda ózge máseleler boıynsha kelispeýshilikter bolǵanyna qaramastan, Ońtústik Kavkazdaǵy saıası basymdyqtardyń ortaq ekenin kórsetedi.
Aıta keteıik, AQSh pen Armenııa beıbit atom salasyndaǵy yntymaqtastyq jóninde kelisimge keldi.