Vengrııanyń eki aımaǵynda mıgranttar aǵyny saldarynan tótenshe jaǵdaı engizilgen
ASTANA. QazAqparat - Vengrııa bıligi eldiń ońtústigindegi eki aımaqta elge Serbııa aýmaǵy arqyly ótip jatqan Taıaý Shyǵys mıgranttary sanynyń kúrt kóbeıýine baılanysty tótenshe jaǵdaı engizdi.
Vengrııa úkimetiniń resmı ókili polıtsııa sol arqyly zańsyz kóshi-qonǵa qarsy kúreste qosymsha ókilettilik alyp, sondaı-aq áskerden kómek suraı alatynyn túsindirdi, dep habarlaıdy Bı-bı-sı.
Óz kezeginde polıtsııa shekaradan qorshaýdaǵy tesikter arqyly zańsyz ótpekshi bolyp júrgen mıgranttardy ustaýǵa kiriskenin málimdep otyr.
Buǵan deıin seısenbi kúni Vengrııa bıligi kóshi-qon zańnamasyna bosqyndardyń elde pana alýyna quqyqtaryn shekteıtin ózgeristerdi bekitti. Endi Serbııadan kelgen mıgranttardyń ótinishteri qarastyrylmaıdy.
