Vengrııadaǵy ýnıversıtette «Qazaqstan joly jáne N.Á.Nazarbaev» kafedrasy ashyldy
ASTANA. QazAqparat - Vengrııada 28 sáýir kúni Qazaqstan delegatsııasynyń qatysýymen Sekeshfehervar qalasyndaǵy ıAnosh Kodolanı atyndaǵy qoldanbaly ǵylymdar ýnıversıtetinde «Qazaqstan joly jáne N.Á.Nazarbaev» qurmetti kafedrasynyń saltanatty ashylý rásimi bolyp ótti.
Bul týraly Aqordanyń baspasóz qyzmetinen habarlady.
Atalmysh jobany vengr tarapy QR Tuńǵysh Prezıdenti kitaphanasynyń jáne QR Vengrııadaǵy Elshiliginiń qoldaýymen ári Abaı atyndaǵy Qazaq ulttyq pedagogıka ýnıversıtetimen birlese otyryp júzege asyrdy.
Rásimde sóz alǵan QR Prezıdenti Keńsesiniń bastyǵy Mahmut Qasymbekov, QR Vengrııadaǵy Elshisi Nurbah Rústemov, Sekeshfehervar qalasynyń meri Andrash Cher-Polkovıch, Abaı atyndaǵy Qazaq ulttyq pedagogıka ýnıversıtetiniń rektory Serik Pirálıev jáne ıA.Kodolanı atyndaǵy qoldanbaly ǵylymdar ýnıversıtetiniń rektory Peter Sabo Vengrııanyń jetekshi ýnıversıtetteriniń biriniń qabyrǵasynda osyndaı ǵylymı-bilim berý ortalyǵynyń ashylýy stýdentter men oqytýshylarǵa qazirgi Qazaqstan, onyń ereksheligi men damý keleshegi, qazaq halqynyń tarıhy men mádenıeti, Prezıdent N.Á.Nazarbaevtyń qyzmeti týraly kóbirek bilýine, sondaı-aq birlesken ǵylymı-zertteý jobalaryna qosymsha serpin beretindigin atap ótti.
Qazaqstan tarapy ýnıversıtettiń kitaphanasyna syı retinde Qazaqstan týraly úlken kitaptar keshenin tartý etti.
Rásimniń sońynda ıA.Kodolanı atyndaǵy qoldanbaly ǵylymdar ýnıversıtetiniń, Abaı atyndaǵy Qazaq ulttyq pedagogıka ýnıversıtetiniń, QR Tuńǵysh Prezıdenti kitaphanasynyń jáne QR Vengrııadaǵy Elshiliginiń arasynda tórt jaqty memorandýmǵa qol qoıyldy.
