Vengrııada Nemat Kelimbetovtiń kitaby tanystyryldy

ASTANA. QazAqparat - Ishtvan Sechenı atyndaǵy Vengrııa ulttyq kitaphanasyndaǵy Qazaqstannyń ádebıeti men mádenıeti ortalyǵynda tanymal qazaqstandyq jazýshy Nemat Kelimbetovtiń «Úmit úzgim kelmeıdi» kitabynyń tanystyrylymy ótti, dep habarlaıdy QR Syrtqy ister mınıstrliginiń baspasóz qyzmeti.

Nemat Kelimbetovtiń «Úmit úzgim kelmeıdi» týyndysy álemniń 19 tiline aýdarylǵan, onyń ishinde vengr tili de bar. Bul kitap Eýropadaǵy eń bedeldi ádebı syılyqtardyń biri - Frants Kafka júldesin jeńip alǵan. Shyǵarma «Úmit úzgim kelmeıdi» povest-monologynan jáne qazaqtardyń arǵy batyr babalary - saqtar, ǵundar jáne ejelgi túrkilerdiń obrazy kórinis tapqan «Ulyma hat» essesinen quralǵan.

Nemat Kelimbetovtiń kitabyna pikir jazǵan Vengrııa memlekettik jınalys (parlament) tóraǵasynyń orynbasary Shandor Lejak jalpyálemdik órkenıet  konteksinde jańa mádenı baǵyttardy sińirip, damytyp kele jatqan Qazaqstannyń mádenı murasyn joǵary baǵalaıtynyn málim etti.

Ulttyq kitaphananyń dırektory, shyǵystanýshy Laslo Tıýshke Qazaqstannyń mádenı muraǵa baı ekenin basa aıtty. Sondaı-aq, ol Orhon-Enıseıdegi jazba eskertkishteriniń túrki taıpalarynyń sóz óneriniń shyǵarmashylyq kúshimen, oı tereńdigimen jáne baı mazmunymen erekshe bolýynyń dáleli ekenin erekshe atap ótti.

Vengrııadaǵy Qazaqstan Elshisi Nurbaq Rústemov tyǵyz mádenı-gýmanıtarlyq baılanystardyń arqasynda Qazaqstan men Vengrııa arasyndaǵy qarym-qatynastardyń yntymaqtastyqtyń strategııalyq deńgeıine jetkenin málimdedi.

Shara sońynda Derd Boronkaı atyndaǵy vengrııalyq gımnazııa oqýshysy Boglarka Feher qobyzben qazaq dalasynyń áýenin tartyp berdi.