Vengrııada er adam ushaqty aıdap áketip, atom elektr stantsııasyna qaraı baǵyt alǵan
ASTANA. KAZINFORM – Vengrııada 24 jastaǵy er adam shaǵyn Cessna 172 ushaǵyn aıdap áketip, Paksh atom elektr stantsııasyna qaraı baǵyt alǵan soń eldiń áskerı kúshteri joıǵysh ushaqtardy áýege kóterdi, dep habarlaıdy BILD jergilikti BAQ-qa silteme jasap.
Oqıǵa 19 tamyzda bolǵan. Jergilikti BAQ málimetinshe, er adam Kalocha áýejaıynan Cessna 172 ushaǵyn ruqsatsyz alyp ushqan.
Ushaq áýege kóterilgennen keıin kóp uzamaı radarlarǵa túsken. Onyń Paksh atom elektr stantsııasy baǵytynda ushyp bara jatqany anyqtalǵan soń áskerı joıǵyshtar kóterilip, Cessna-ny áýede baqylaýǵa alǵan.
Birneshe mınýttan keıin er adam ushaqty apatty jaǵdaıda qondyrýǵa májbúr bolǵan. Aero Telegraph málimetinshe, qoný kezinde ushaqtyń shassıi zaqymdanyp, áýe kemesi bir qanatyna súıenip toqtaǵan.
Osydan keıin kúdikti oqıǵa ornynan qashýǵa áreket jasaǵan. Jolda ony kólik júrgizýshisi baıqap, jaraqat alǵan bolýy múmkin dep kómek kórsetpek bolǵan. Alaıda kóp uzamaı polıtsııa qyzmetkerleri kelip, er adamdy ustaǵan.
Kúdikti aýrýhanaǵa jetkizilip, onyń alkogoldik masań kúıde bolǵany anyqtalǵan.
– Men mas bolǵanym sonshalyq, ushaqty qalaı aıdap áketkenimdi múlde esime túsire almaımyn, – degen kúdikti esin jıǵannan keıingi polıtsııanyń suraǵynda, dep jazady vengrııalyq 24.hu portaly.
Er adamnyń ushaqty ne úshin aıdap áketkeni ázirge belgisiz. Tergeýshiler oqıǵanyń naqty mán-jaıyn anyqtap jatyr. Sondaı-aq kúdiktiniń ushqysh lıtsenzııasy bar-joǵy da tekserilip jatyr.
Aıta keteıik, Kanadada balanyń qylyǵy ushaq reısiniń toqtaýyna sebep boldy.
