Vengrııada bosqyndar boıynsha referendým ótip jatyr
ASTANA. QazAqparat - Vengrııa azamattary saılaý ýchaskelerine bet aldy: elde bosqyndar týraly referendým ótip jatyr, dep habarlady euronews.com.
Jalpyhalyqtyq daýys berýge qatysýshylar «Parlamenttiń kelisiminsiz Vengrııaǵa adam kóshirý týraly Eýroodaqtyń sheshim qabyldaýyna ruqsat etesizder me?» degen suraqqa jaýap berýi tıis.
Ótken jyly Eýrokomıssııa Eýroodaqtyń barlyq 28 eline Italııa men Grekııaǵa zańsyz kelgen bosqyndardy 160 myńnan bólip qabyldaý týraly kvota engizýdi usyndy. Biraq, kóptegen elder bul baǵdarlamany oryndaýdan bas tartty. Vengrııadan bólek, Polsha, Chehııa jáne Slovakııa mindetti kvota júıesine qarsy shyqty.
Eger halyqtyń 50% qatyssa, vengerlik referendým ótti dep sanalady. Áleýmettik saýalnamalarǵa súıensek, halyqtyń 70% mindetti kvotaǵa qarsy daýys berýge daıyn.
Plebıstsıttiń eshqandaı zańdyq kúshi bolmaıdy, alaıda Býdapesht Lıssabon shartyna kóshi-qondy retteıtin erejelerdi alyp tastaý týraly ózgerister engizýdi talap etýi múmkin.