Vengrııa vıtse-premeri partııa jetekshiliginen ketýge ótinish berdi
ASTANA. KAZINFORM – Vengrııanyń vıtse-premeri Jolt Shemen parlament saılaýyndaǵy jeńilisten keıin Hrıstıan-demokratııalyq halyq partııasynyń (HDHP) tóraǵasy qyzmetinen ketý týraly ótinish berdi.
TASS málimetinshe, bılik koalıtsııasyna kiretin HDHP Vıktor Orban jetekshilik etetin «FIDES – Vengrııa azamattyq odaǵy» partııasymen birge parlamenttegi basymdyqtan aıyrylyp, «Tısa» oppozıtsııalyq partııasyna jol bergen.
– Jolt Shemen saılaýdaǵy nátıje úshin jaýapkershilikti óz moınyna alyp, qyzmetinen ketý týraly ótinish jazdy. Alaıda ol partııa tóralqasynyń jabyq daýys berýinde biraýyzdan qabyldanbaı qaldy, – delingen habarlamada.
Saıasatker partııa basshysy qyzmetinde «býyn almasýy men jańarý kezeńinde» qalýǵa kelisim bergenin aıtty.
– Men bul mindetti oryndaımyn, – dedi Jolt Shemen.
Sonymen qatar uqsas mindetter «FIDES» partııasynyń aldynda da tur. Partııa jaqyn arada aldaǵy saıası strategııasyn aıqyndaý úshin otyrystar ótkizedi. Onda Vıktor Orbannyń partııa kóshbasshysy retinde qalý-qalmaýy da qaralady.
Al Vengrııa parlamentiniń jańa shaqyrylymdaǵy alǵashqy otyrysy 9 mamyrǵa josparlanǵan. Onda «Tısa» partııasynyń jetekshisi Peter Madıar jańa premer-mınıstr bolyp saılanýy múmkin.
Jańa quramda «FIDES» pen HDHP parlamenttegi 199 orynnyń 52-sin ǵana ıelenip, oppozıtsııaǵa ótedi.
Aıta keteıik, AQSh vıtse-prezıdenti parlament saılaýy aldynda Vengrııaǵa barady.
