Majarstan–Slovenııa matchy majar elindegi eń kóp qaralǵan sporttyq translıatsııa boldy
ASTANA. KAZINFORM – Kóktemgi fýtbol maýsymy endi ǵana bastalǵanyna qaramastan, Majarstannyń qoǵamdyq sport arnasy bıylǵy jyldyń eń kóp qaralǵan sporttyq translıatsııasyn kórsetti. Majarstan men Slovenııa quramalary arasyndaǵy joldastyq matchty teledıdar arqyly 1 mıllıonnan astam kórermen tamashalaǵan. Bul týraly majarstandyq MTVA aqparat agenttigi jazdy.
Gemius Prism zertteý derekterine sáıkes, matchtyń alǵashqy taımyn shamamen 460 myń adam kórse, ekinshi taımdy 587 myń kórermen tamashalaǵan. Sonymen qatar m4sport.hu jáne Médiaklik onlaın platformalarynda da qyzyǵýshylyq joǵary bolǵan. Jalpy qaralym sany shırek mıllıonǵa jýyqtaǵan.
Match boıyndaǵy ortasha kórsetkishterdi eseptegende, translıatsııa kezinde M4 Sport arnasy eń kóp qaralǵan telearna atandy.
Senbi kúni Majarstan ulttyq quramasy Slovenııaǵa qarsy joldastyq kezdesý ótkizdi. Oıyn tartysty ári teń dárejede ótti. Majarstan komandasy birneshe qaýipti sát uıymdastyryp, jalpy oıyn barysynda belsendirek kórindi. Al slovenııalyqtar negizinen qorǵanysqa súıenip, qarsy shabýyldarǵa ıek artty.
Kezdesý 1:0 esebimen Majarstan quramasynyń jeńisimen aıaqtaldy. Jeńis golyn matchtyń 79-mınýtynda Sabolch Shen soqty. Osylaısha majarlardyń ulttyq quramasy qarasha aıynan bergi úzilisten keıin sátti oralyp, seısenbi kúni ótetin Grekııaǵa qarsy match aldynda úmit syılaıtyn oıyn kórsetti.
Eske sala ketsek, Majarstan men Grekııa arasyndaǵy joldastyq match 31 naýryz kúni jergilikti ýaqyt boıynsha saǵat 19:00-de ótedi. Kezdesý tikeleı efırde M4 Sport arnasynan kórsetiledi.
Al Qazaqstan men Majarstan quramalarynyń joldastyq kezdesýi ótetin oryn ózgerdi.
Alǵashqyda atalǵan oıyndy Túrkistan qalasynda ótkizý josparlanǵan edi. Qazaqstan jáne Majarstan fýtbol federatsııalarynyń kelisimimen endi ol Debretsen qalasyna aýystyryldy. Oıyn 9 maýsymda «Naderdeı» stadıonynda ótedi.
Aıta keteıik, 25 naýryz kúni fýtboldan Qazaqstan ulttyq quramasy Astanada ótip jatqan FIFA Series-2026 týrnırindegi alǵashqy oıynynda Namıbııamen kezdesip, 2:0 esebimen basym tústi.
