Vengrııa Serbııamen shekarasyna ekinshi qorshaý salady
ASTANA. QazAqparat - Vengrııa úkimeti Serbııamen shekarasyna ekinshi qorshaý salýdy kózdep otyr. Muny Horvatııada ótip jatqan aımaqtyq konferentsııa barysynda Vengrııanyń syrtqy ister mınıstri málimdedi, dep jazady 24.kz.
Bul - eldi zańsyz mıgranttardyń aǵynynan saqtap qalýǵa baǵyttalǵan shara. 2015 jyly shekarada salynǵan alǵashqy dýal elge kelgen bosqyndar sanyn azaıtýǵa sep bolǵan edi. Vengrııa bıligi Túrkııanyń mıgratsııa salasyna qatysty saıasatynyń ózgerý múmkindiginen qaýiptenip otyr.
Eske sala ketsek, Ankara men Eýroodaq arasyndaǵy kelisim boıynsha, Túrkııa óz aýmaǵy arqyly Eýropaǵa ótken bosqyndardy qabyldaıtyn boldy. Al Eýroodaq Ankaraǵa 3 mlrd eýro bólýi tıis. Alaıda jaqynda Túrkııa syrtqy ister mınıstri Mevlýt Chavýshoglý qazan aıyna deıin Eýroodaq osy eldiń azamattary úshin vızasyz baryp-kelý tártibin ornatpasa, bul kelisimnen bas tartatynyn málimdegen bolatyn.
