Vengrııa prezıdenti plagıat úshin ǵylymı ataǵynan aıyryldy
ASTANA. 31 naýryz. QazAqparat - Ignats Zemmelvaıs atyndaǵy Býdapesht medıtsına jáne sport ýnıversıtetiniń ǵylymı keńesi el prezıdenti Pal Shmıttiń ǵylymı ataǵyn alyp tastaý týraly sheshim qabyldady.
Mundaı qatal sheshim shyǵarýǵa memleket basshysynyń doktorlyq dıssertatsııasynyń kásibı jáne etıkalyq normalarǵa saı emes dep tanylýy sebep bolǵan, dep habarlaıdy Ýtro.rý.
Zemmelvaıs ýnıversıteti prezıdenttiń ǵylymı eńbegin bıyl qańtar aıynda vengerlik BAQ ókilderi atalmysh dıssertatsııada bolgarlyq ǵalym Nıkolaı Georgıevtiń shyǵarmalarynan kóshirip alynǵan taraýlar bar dep aıyptaǵannan keıin muqııat tekserip shyqqan. Eksperttik komıssııa jýrnalısterdiń boljamyn qýattap, ǵylymı keńestiń 33 múshesi bolgarlyq ǵalymnyń eńbegin eshbir siltemesiz kóshirip alǵandyqtan P. Shmıttiń ǵylymı ataǵyn alyp tastaýǵa sheshim qabyldaǵan.
Fehtovanıeden 1968 jáne 1972 jyldardaǵy Olımpıadalyq oıyndardyń chempıony bolyp tabylatyn P. Shmıtt 1992 jyly Vengerlik dene tárbıesi ýnıversıtetinde (keıin Zemmelvaıs ýnıversıtetiniń quramyna kirgen) «Qazirgi zamanǵy Olımpıadalyq oıyndar baǵdarlamasyn analızdeý» degen taqyryp boıynsha doktorlyq dıssertatsııa qorǵaǵan bolatyn.
Shmıtt óz qyzmetinen merziminen buryn ketpeıtinin málimdegen. Burynǵy sportshy, Vengrııanyń Ulttyq olımpıadalyq komıtetiniń eks-basshysy el prezıdenti bolyp 2010 jyly saılanǵan bolatyn.
