Vengrııa prezıdenti Katalın Novak otstavkaǵa ketti
ASTANA. KAZINFORM – Vengrııa prezıdenti Katalın Novak balalarǵa jynystyq zorlyq-zombylyqty jasyrdy dep aıyptalǵan er adamǵa keshirim berý týraly daýdan keıin otstavkaǵa ketetinin málimdedi. Bul týraly Uza.uz jazdy.
Reuters agenttiginiń habarlaýynsha, Novaktyń otstavkaǵa ketýin eldegi barlyq oppozıtsııalyq partııa talap etti. Óıtkeni ol 2023 jyldyń kókteminde Rım Papasynyń sapary aldynda balalar úıi dırektorynyń burynǵy orynbasaryna keshirim berý týraly ótinishin qanaǵattandyrǵan bolatyn.
Ol mektep dırektoryna oqýshylaryna jasalǵan seksýaldyq zorlyq-zombylyqty jasyrýǵa kómekteskeni úshin 3 jyl 4 aıǵa bas bostandyǵynan aıyrylǵan edi.
Óz úndeýinde Novak «qatelik jibergenin» aıtqan. Endi Vengrııa parlamenti 30 kún ishinde jańa memleket basshysyn saılaıdy.
Katalın Novak óz prezıdenttigin 2022 jyldyń naýryzynda bastady. Ol Vengrııa tarıhyndaǵy tuńǵysh áıel prezıdent boldy.
