Vengrııa LGBT qaýymdastyǵyna qatysty birqatar tyıymdy alyp tastady
ASTANA. KAZINFORM – Vengrııa parlamenti 2021 jyldan beri qoldanysta bolǵan LGBT taqyrybyndaǵy aqparatty taratýǵa jáne kámeletke tolmaǵandarǵa birjynysty qatynastardy kórsetýge qatysty tyıymdardyń kúshin joıdy, dep habarlaıdy Deutsche Welle.
13 qazanda Býdapeshtte ótken parlament otyrysynda premer-mınıstr Peter Madıar úkimeti usynǵan zań jobasy maquldandy. Qujatty 139 depýtat qoldap, 51 depýtat qarsy daýys berdi.
Osylaısha, «Balalardy qorǵaý týraly» zańnan LGBT taqyrybyndaǵy aqparatty taratýǵa qatysty daýly shekteýler alynyp tastaldy. Alaıda balalardyń fızıkalyq, ıntellektýaldyq, emotsıonaldyq nemese adamgershilik damýyna eleýli zııan keltirýi múmkin materıaldarǵa tyıym saqtalady.
Bul – Vıktor Orban bıligi kezinde qabyldanǵan LGBT qaýymdastyǵyna qatysty shekteýlerdiń Peter Madıar premer-mınıstr qyzmetine kiriskennen keıin alǵash ret eleýli túrde jeńildetilýi.
Eýropalyq komıssııa Vengrııa parlamentiniń sheshimin quptap, ony Eýroodaqtyń ortaq qundylyqtaryna adaldyqtyń mańyzdy belgisi dep baǵalady.
– LGBTK qaýymdastyǵynyń quqyqtary – Eýropalyq Odaqtaǵy negizgi quqyqtardyń biri, – delingen EO-nyń teńdik máseleleri jónindegi komıssary Hadja Lahbıb pen tutynýshylar quqyqtaryn qorǵaý jónindegi komıssar Maıkl Makgrattyń birlesken málimdemesinde.
Buǵan deıin, 2021 jyly Vıktor Orban úkimeti qabyldaǵan zań boıynsha 18 jasqa tolmaǵan balalar men jasóspirimderge gomoseksýaldyq qatynastar men genderlik aýysý týraly aqparat berýge shekteý qoıylǵan edi. Teledıdarda birjynysty qatynastardy kórsetý aıyppul salýǵa negiz bolǵan.
Sondaı-aq atalǵan zań Býdapeshtte LGBT sherýin ótkizýge tyıym salý úshin paıdalanylǵan.
2026 jyldyń sáýirinde Lıýksembýrgtegi Eýropalyq Odaq soty Vengrııanyń bul zańyn EO quqyqtaryna qaıshy dep tanydy. Al 2022 jyldyń sońynan beri Eýroodaq osy zańǵa baılanysty Vengrııaǵa bólinetin shamamen 500 mln eýro qarjyny toqtatqan bolatyn.
Bıyl sáýirde ótken parlament saılaýynda «Tısa» partııasy jeńiske jetip, 2010 jyldan beri bılik basynda bolǵan Vıktor Orban premer-mınıstr qyzmetinen ketti. Onyń ornyna Peter Madıar keldi.
Aıta keteıik, buǵan deıin Vengrııa parlamenti Konstıtýtsııaǵa adamnyń tek er nemese áıel jynysyna jatatynyn bekitetin túzetýdi maquldaǵan bolatyn. Sol kezdegi zańnamalyq ózgerister LGBT sherýlerine qoıylǵan shekteýlerdi kúsheıtýge baǵyttalǵany habarlanǵan edi.
