Vengrııa kedeninde tabylǵan 412 tarıhı jádiger Túrkııaǵa tapsyryldy

BÝDAPEShT. Anadoly-QazAqparat – Vengrııanyń Syrtqy ister jáne syrtqy saýda mınıstri Peter Sıııarto Túrkııa eliniń Syrtqy ister mınıstri Mevlıýt Chavýshoǵlyǵa 2015 jyly Vengrııa kedeninde tekserý kezinde alynǵan 412 tarıhı jádigerdi tapsyrdy, dep habarlaıdy QazAqparat Anadoly aqparattyq agenttigine silteme jasap.

Vengrııaǵa resmı saparmen kelgen túrik dıplomatııasynyń basshysy Sıııartomen «kózbe kóz» formatyndaǵy kezdesý ótkizdi. Kelissózderden keıin delegatsııalardyń qatysýymen keńeıtilgen quramdaǵy kezdesý boldy.

Kezdesý aıasynda Vengrııa mınıstri 2015 jyly vengrııalyq shekarada anyqtalǵan tarıhı jádigerlerdi tapsyrdy.

Chavýshoǵly Vengrııa bıligine túrik halqynyń atynan alǵysyn bildirip, bul jádigerlerdi Túrkııada taǵatsyzdana kútip otyrǵanyn málimdedi.

«Biz 2015 jyly Vengrııa shekarasyndaǵy tekserý kezinde tabylǵan Anatolııa kezeńine jatqyzylatyn tarıhı jádigerlerdi aldyq, endi ony elimizdiń mádenıet jáne týrızm mınıstri Mehmet Nýrı Ersoıǵa tapsyramyz. Dostas Vengrııa eline bul protseste qoldaý bildirgeni úshin alǵysymyzdy bildiremiz», - dep jazdy Chavýshoǵly Twitter-de.

Vengrııanyń quqyq qorǵaý organdary bul jádigerlerdi 6 jylǵa jýyq ýaqyt buryn Túrkııa azamatynyń kóliktik quralyn tekserý kezinde anyqtaǵan.

Tabylǵan zattar týraly aqparat Túrkııanyń SІM-niń Interpol jáne Eýropolmen jumys júrgizý bólimine jiberilgen.