Vengrııa Qazaqstanda tuqym óndiretin zaýyt salýǵa nıetti
ASTANA. KAZINFORM – Aýyl sharýashylyǵy mınıstri Aıdarbek Saparov Vengrııanyń Tótenshe jáne Ókiletti Elshisi Otto Ivan Ronmen kezdesti. Bul týraly QR AShM baspasóz qyzmeti málimdedi.
Vengrııa delegatsııasynyń quramyna Vengrııa Elshiliginiń saýda keńesshisi Zoltan Nıtraı, Qurmetti konsýl, «LAC Holding» prezıdenti Laslo Horvat, Prezıdenttiń keńesshileri Pıter Mıshkýtsa jáne Laıosh Ochaı kirdi.
«Kezdesý barysynda taraptar Qazaqstanda tuqym shıkizatyn qaıta óńdeý jónindegi tuqym zaýytyn, mal sharýashylyǵyna qajetti jemshóp bazasyn óndirý jónindegi úlgili sharýashylyqtardy, agrarlyq salany damytý úshin qazaq-Vengrııa birlesken qoryn qurý máselelerin talqylady», — delingen habarlamada.
Aıdarbek Saparov Vengrııa tarapymen basqa da basym baǵyttarda yntymaqtasýǵa daıyn ekendigin atap ótti.
«AÓK salasyndaǵy birlesken jobalardy iske asyrýdaǵy yntymaqtastyq biz úshin úlken qyzyǵýshylyq týdyrady. Investorlarǵa jan — jaqty qoldaý kórsetiledi», — dedi mınıstr.
«LAC Holding» kompanııasynyń prezıdenti Laslo Horvat Aýyl sharýashylyǵyn damytýdaǵy ózara is-qımyl josparlary týraly habarlady.
Atap aıtqanda, QR AShM Vengrııa aýyl sharýashylyǵy ýnıversıtetimen tájirıbe almasý týraly ýaǵdalastyqqa qol jetkizdi. Osy jumys aıasynda Vengr agronom mamandary qazaqstandyq agrarshylarmen óz bilimderi men jetistikterimen bólisedi.
