Venetsııalyqtar gondolerlerdiń azaıyp bara jatqanyna alańdaýly

ASTANA. KAZINFORM – Italııalyq Venetsııada ata jolyn qýǵan qaıyqshylar sany azaıyp keledi.

Gondolalardy basqarý úshin adam jaldaý ýaqyt ótken saıyn qıynǵa soǵyp keledi. Gondol lıtsenzııalary kóbinese muraǵa qaldyrylady.

Bolashaq qaıyqshylar ıtalııa tilin bilýi, deni saý bolýy, júze bilýi, alǵashqy medıtsınalyq kómek kórsete alýy jáne Venetsııa tarıhyn bilýi kerek. Ony oqý myń eýro turady jáne alty aıǵa sozylady, biraq tez aqtalady.

Jarty saǵat qaıyqpen saıahattaý úshin týrıster keshki saǵat jetiden keıin shamamen 80 eýro tóleıdi. Keıde tipti 100 eýroǵa deıin kóteriledi. Án aıtý nemese mýzykalyq aspapta oınaý arqyly gondoler odan da kóp aqsha taba alady.

-Alaıda, aldyńǵy býyn zeınetkerlikke shyǵyp, ornyn almastyratyndar tapshy bolyp otyr, - dedi Venetsııa gondolerler qaýymdastyǵynyń prezıdenti Andrea Balbı sheteldik BAQ-qa bergen suhbatynda.

Bir kezderi Venetsııada myńdaǵan gondolerler qaýymdastyǵy boldy, olardy ádettegi kıimderinde - jolaqty jeıde men saban qalpaqpen kórýge bolatyn jáne olar qaıyqty bir eskekpen basqaratyn. Al búginde olardyń sany 450-den az.