Venetsııalyq belsendiler Djeff Bezostyń toıyna qarsylyq tanytyp jatyr
ASTANA. KAZINFORM — Venetsııada belsendiler Amazon kompanııasynyń negizin qalaýshy Djeff Bezostyń aldaǵy aptada óziniń súıiktisi Loren Sanchespen nekelesýine qarsy birneshe narazylyq aktsııasyn bastady, dep habarlaıdy BBC.
Bul birneshe mıllıon dollar turatyn aýqymdy saltanatty shara bolady, sonyń saldarynan áıgili qalanyń keıbir aýdany ýaqytsha jabylýy múmkin.
Osyǵan baılanysty belsendiler San-Djordjo Madjore bazılıkasynyń qońyraý munarasynan jáne Rıalto kópirinen Bezosqa qarsy bannerler ildi. Sonymen qatar kelesi aptada olar venetsııalyq kanaldarǵa sekirip, olardy bógep, qonaqtardyń toı ótetin jerge jetýine kedergi jasaý maqsatynda tar kóshelerdi jaýyp, is-sharany buzýǵa nıetti.
Belgili bolǵandaı, 23-28 maýsym aralyǵynda júzdegen mártebeli qonaqtar San-Marko alańynyń qarama-qarsy jaǵyndaǵy San-Djordjo aralynda ótetin toıǵa qatysý úshin Venetsııaǵa barady.
Italııalyq BAQ málimetteri boıynsha, toıǵa arnalǵan barlyq sándi qonaqúıler men kóptegen sý taksıi áldeqashan brondalyp qoıǵan.
Budan buryn Reliance Industries tóraǵasy ári Úndistandaǵy eń baı adamdardyń biri Mýkesh Ambanıdiń uly Anant Ambanı farmatsevtıkalyq magnat Vıren Merchanttyń qyzy Radıka Merchantqa úılenetini habarlandy.