Venetsııada týrıstik alym 30 eýroǵa deıin kóteriledi
ASTANA. KAZINFORM — Venetsııaǵa qysqa merzimge baratyn týrıster úshin qalaǵa kirý quny edáýir qymbattaýy múmkin. Qazir mereke nemese demalys kúnderi keletin týrısterden 5 nemese 10 eýro alynatyn bolsa, 2027 jyldan bastap bul soma 30 eýroǵa deıin kóterilýi yqtımal, dep habarlaıdy BILD.
Qala ákimdigi qazirgi alym týrıster aǵynyn tejeýge jetkiliksiz degen pikirde.
Qarjylyq turǵydan alǵanda, týrıstik alym ázirge qalaǵa paıda ákelip otyr. 2026 jyly odan túsken kiris 5 mln eýrodan asty. Alaıda bul shara Venetsııadaǵy adam kóptigi máselesin sheshe alǵan joq. Qala bıligi alymnyń qymbattaýy týrısterdiń de azaıýyna, tynysh kúnderi saıahattaýǵa yntalandyrady dep úmittenedi. Óıtkeni mundaı kúnderi alym alynbaıdy.
Bıyl 27 shildege deıin 5 nemese 10 eýro kólemindegi alym synaq retinde engizilip, tek mereke jáne demalys kúnderi alynǵan. Qazir týrıster qalaǵa tegin kire alady. Alymdy 2027 jylǵy Pasha merekesinen bastap qaıta engizý josparlanyp otyr. Alaıda bul úshin qala bıligine Italııa úkimetiniń kelisimi qajet.
Venetsııada birneshe kúnge qalatyn týrıster úshin de shyǵyn artýy múmkin. Qala ákimdigi qonaqúıler men páterlerde turatyn týrısterge salynatyn alymdy kóterý múmkindigin qarastyryp jatyr.
Eske salaıyq, mundaı másele buǵan deıin de kóterilgen. Byltyrǵy jyly Venetsııada bir kúndik sapar úshin týrıstik alym qaıta engizilip jatqany habarlanǵan bolatyn.
