Venetsııada bir kúndik sapar úshin týrıstik alym qaıta engizilip jatyr
ASTANA. KAZINFORM – Venetsııaǵa kirýdiń jańa tártibi 2025 jylǵy 18 sáýir men 27 shilde aralyǵynda kúshinde bolady. Bul týraly Anadoly habarlady.
Bıyl Venetsııa bıligi bir kúndik saparmen keletin týrısterden kirý aqysyn alýdy jalǵastyrady. Bul shara alǵash ret ótken jyly týrıster legin baqylaý maqsatynda engizilgen.
2023 jyldyń qyrkúıeginde Venetsııa qalalyq keńesi jappaı týrızmmen kúresý aıasynda qabyldaǵan sheshimge sáıkes, bul júıe byltyr 29 kún boıy synaq retinde qoldanyldy. 2025 jyly ol 54 kún ishinde, týrıstik aǵynnyń kóbeıetin kezeńinde bolady.
Bıyl bul júıe 18 sáýir men 27 shilde aralyǵynda, negizinen mereke jáne demalys kúnderine sáıkes keletin kúnderi qoldanylady.
Kóktem men jaz mezgilinde Venetsııanyń tarıhı bóligin aralaýdy josparlaǵan týrıster, eger olardyń sapary osy 54 kúnniń birine sáıkes kelse, aldyn ala kirý ýaqytyn brondap, tólem jasaýy qajet bolady.
Bul úshin arnaıy jasalǵan Contributo di Accesso a Venezia («Venetsııaǵa kirý jarnasy») ınternet-portaly arqyly tirkelip, tólem jasaýy kerek.
Bıylǵy tártipke sáıkes, eger týrıst saparynan 4 kún buryn tólem jasasa — aqy 5 eýro, al 3 kúnnen az ýaqyt qalǵanda — 10 eýro bolady.
Sonymen qatar, tólem jasamaǵan nemese portalǵa tirkelmegen týrısterge salynatyn aıyppul byltyrǵyǵa qaraǵanda eki ese azaıtyldy. Aıyppul kólemi 25 eýrodan 150 eýroǵa aralyǵynda bolady (oǵan qosymsha 10 eýro kirý aqysy qosylady).
Byltyrǵydaı, qalanyń negizgi kirý núktelerinde Santa-Lýchııa temirjol vokzalynda, Rım alańynda jáne Tronketto avtoturaǵynda aqparattyq taqtalar men baqylaý jáne tólem pýnktteri ornatylady.
Qalaǵa kelgen týrıster, meıli jergilikti, meıli sheteldik bolsyn, eger ınternet arqyly aldyn ala tólem jasamaǵan bolsa, sol oryndarda rásimdeýdi aıaqtaı alady.
Alaıda, keıbir synshylar bul shara eń qyzǵan týrıstik kúnderde de Venetsııaǵa kelýshilerdiń sanyn azaıtpaıtynyn alǵa tartady.
Qalalyq ákimdik byltyr 29 kún ishinde 5 eýro kóleminde alynǵan alymnan 2,4 mıllıon eýro tabys túskenin habarlady.
Qalalyq keńestiń bıýdjetti qadaǵalaıtyn múshesi Mıkele Zýın bıylǵy tabys ótken jylmen salystyrǵanda 1–1,5 mıllıon eýroǵa artýy múmkin ekenin aıtty.
Arnalarǵa salynǵan erekshe sáýleti men baı tarıhı murasymen tanymal Venetsııa jyl saıyn álemniń túkpir-túkpirinen mıllıondaǵan týrısti tartady.
Aıta ketelik Venetsııa 2150 jyly sý astynda qalýy múmkin.