Venetsııa 2150 jyly sý astynda qalýy múmkin

ASTANA. KAZINFORM – Venetsııa 2150 jylǵa qaraı tolyǵymen sý astynda qalýy múmkin. Mundaı boljamdy Geofızıka jáne výlkanologııa ulttyq ınstıtýty júrgizgen halyqaralyq jobanyń bir stsenarııi qarastyrady, dep habarlaıdy TASS.

Zertteýshilerdiń qorytyndylaryna sáıkes, «Moıseı» bóget júıesi qalany qorǵaý úshin jetkiliksiz bolady, dep habarlaıdy RAI News 24 aqparattyq arnasy.

Sý tasqynyn modeldeý 2050, 2100 jáne 2150 jyldarǵa jasalǵan. Eń nashar stsenarıı XXII ǵasyrdyń ortasyna sáıkes kelip otyr, bul kezde 139-226 sharshy shaqyrym aýmaq sý astynda qalýy múmkin.

— Qosymsha qorǵanys sharalarynsyz, sý basa qalsa Venetsııanyń jergilikti halqy men mádenı murasyna eleýli zalal keltiriledi, — dep eskertedi ǵalymdar.

Olardyń túsindirýinshe, klımattyń ózgerýimen kúsheıetin «joǵary sý» áseri jerdiń birtindep tómendeýine jáne teńizge sińýine ákeledi. Qazirgi ýaqytta bul protsess jylyna 7 mm jyldamdyqpen júrip otyr.

150-den astam aralǵa salynǵan Venetsııany joıylyp ketýden saqtaý úshin arnaıy mobıldi bóget júıesi ázirlengen. Birneshe jyl buryn qurylysy qymbatqa túskeni úshin kóp pikirtalas týdyrǵan «Moıseı» bógeti iske qosylyp, sońǵy jyldary Venetsııany «joǵary sýdan» qorǵap keledi.

«Joǵary sý» qubylysy aıdyń tsıklderine baılanysty teńiz tasqyndarynan týyndaıdy jáne Adrıat teńizi lagýnasyndaǵy shaǵyn araldarda ornalasqan Venetsııanyń aral bóligine tán qubylys. Degenmen, sý deńgeıi mezgil-mezgil kóterilip, Áýlıe Mark alańyn azdap sý basyp turady.

Aıta ketelik venetsııalyqtar gondolerlerdiń azaıyp bara jatqanyna alańdaýly.