Venesýelanyń Ýrıbana túrmesinde bolǵan tártipsizdikterdiń saldarynan elýden astam adam qaza boldy
ASTANA. 26 qańtar. QazAqparat - Juma kúni Venesýeladaǵy Lara shtatyna qarasty Ýrıbana túrmesinde tutqyndardyń kúzetshiler jáne gvardııalyqtarmen bolǵan qarýly qarsylyqtaryna ulasqan búlik saldarynan kem degende 54 adam qaza taýyp, ondaǵan adam jaraqattandy. Jaraqattanǵan 88 adam aýrýhanaǵa jetkizildi, onyń 30-y sonda qalýda. Bul týraly qalalyq ortalyq aýrýhananyń dırektory Barkısımeto Rýı Medına habarlady, dep jazady ITAR-TASS.
Túrme isteri boıynsha mınıstr Irıs Varelanyń aqparattandyrýynsha, túrmedegi tártipsizdikter tutqyndar tobynyń kameralardy tekserý jáne ınspektsııalaýǵa kelgen ulttyq gvardııa qyzmetkerlerine shabýyldaǵan soń bastaldy.
Jergilikti BAQ málimetterinshe, túrmedegi tártipsizdikter aıaýsyz oq atýmen birge júrdi. Onymen qosa qoldan jasalǵan granatalardyń jarylýyna uqsas birneshe dybys estildi. Bılik kózderi bolǵan oqıǵanyń mán-jaıyn keıin ótetin baspasóz máslıhatynda baıandaýdy ýáde etýde.
