Venesýelanyń munaıdan túsken tabysy medıtsına salasyna baǵyttalady – Rodrıges
ASTANA. KAZINFORM — Munaı satýdan túsetin kirister Venesýelanyń densaýlyq saqtaý júıesin jaqsartýǵa baǵyttalmaq. Bul jóninde memlekettik VTV telearnasy Venesýelanyń ýaqytsha prezıdenti Delsı Rodrıgestiń málimdemesine silteme jasap habarlady.
Ol AQSh-tyń Venesýela munaıynyń satylýyn «shekteýsiz merzimge» baqylaýda ustaıtyny týraly málimdemesine qatysty pikir bildirdi.
Rodrıges bılik ókilderi kóp jyldan beri daǵdarystan zardap shegip kele jatqan densaýlyq saqtaý salasyna arnalǵan arnaıy jospar ázirlep jatqanyn atap ótti.
Onyń aıtýynsha, munaı-gaz sektorynan Venesýelaǵa túsetin árbir dollar eldiń densaýlyq saqtaý júıesiniń qajettilikterin óteýge jumsalmaq.
Rodrıges bul jospar aıasynda 75 medıtsınalyq mekeme anyqtalǵanyn habarlady. Sonymen qatar venesýelalyq saıasatker munaı satýdan túsken tabystar Vashıngton basqaratyn shottarǵa aýdarylady degen málimdemelerge túsinikteme berýden bas tartty.
Buǵan deıin AQSh prezıdenti Donald Tramp Venesýelaǵa jasalǵan áskerı aralasýdan keıin eldiń munaı salasyna amerıkalyq kompanııalar tartylatynyn málimdegen edi.
AQSh Energetıka mınıstri Krıs Raıt 7 qańtardaǵy málimdemesinde Venesýelada qajetti ózgeristerge qol jetkizý úshin eldiń munaı satylymyn baqylaý qajet ekenin atap ótip, venesýelalyq munaı «shekteýsiz merzimge» satylatynyn aıtty.
Eske sala ketsek, 7 qańtarda Donald Tramp Venesýelanyń ýaqytsha basshylyǵy AQSh-qa 30-50 mıllıon barrel munaı beretinin málimdedi.
Al AQSh vıtse-prezıdenti Djeı Dı Vens Fox News telearnasyna bergen suhbatynda Vashıngtonnyń ustanymyn ashyq aıtty. Onyń aıtýynsha, Venesýelaǵa energetıkalyq resýrstardy satýǵa tek el bıligi AQSh-tyń múddesine saı áreket etken jaǵdaıda ǵana ruqsat beriledi.