Venesýelanyń munaı sektoryna salynatyn ınvestıtsııa kólemi 1,4 mlrd dollarǵa jetedi

ASTANA. KAZINFORM — Bıyl Venesýelanyń munaı sektoryna salynatyn ınvestıtsııalar kólemi 55%-ǵa ósip, 1,4 mlrd dollarǵa jetedi. Bul týraly Venesýela prezıdentiniń mindetin ýaqytsha atqarýshy Delsı Rodrıges málimdedi. Bul týraly Anadolý agenttigi jazdy.

Rodrıgestiń aıtýynsha, energetıka sektoryndaǵy kópjyldyq qatań memlekettik baqylaýdy toqtatýǵa baǵyttalǵan «Kómirsýtekter týraly» zańǵa ózgerister engizý jobasy parlamentte qabyldanǵannan keıin, osy jyly munaı salasyna ınvestıtsııalar 55%-ǵa artady dep kútilip otyr.

Ótken jyly ınvestıtsııalar kólemi shamamen 900 mln dollardy quraǵanyn atap ótken Rodrıges, bıyl jeke sektordyń qatysýy men keshendi quqyqtyq reformalardyń arqasynda bul kórsetkish 1,4 mlrd dollarǵa deıin jetýi múmkin ekenin aıtty.

«Álemdegi dáleldengen munaı qory eń kóp el bola otyryp, biz óndirý kólemi boıynsha da alyp memleketke aınalýymyz kerek», dedi ol.

Rodrıgestiń bastamasymen ázirlenip, sheteldik kompanııalardyń Venesýelanyń munaı salasyna qatysýyn jeńildetýge baǵyttalǵan «Kómirsýtekter týraly» zańdy reformalaý jobasy buǵan deıin parlamentte alǵashqy maquldaýdan ótken.

«Jer astynda jatqan munaı eshqandaı paıda ákelmeıdi. Eger jaǵdaılar munaı óndirýdi arttyrýǵa kedergi keltirse, onda bizde álemdegi eń iri munaı qory bar dep aıtýdyń qandaı máni bar?», dep túıindedi eldiń ýaqytsha prezıdenti.

Aıta keteıik, Venesýela prezıdentiniń mindetin ýaqytsha atqarýshy Delsı Rodrıges eldiń munaıdan túsken tabysy medıtsına salasyna baǵyttalatynyn málimdegen.