Venesýelanyń burynǵy prezıdentine qatysty sot protsesi eki jylǵa sozylýy múmkin
ASTANA. KAZINFORM — AQSh-ta Venesýelanyń burynǵy prezıdenti Nıkolas Madýronyń isi eki jylǵa sozylýy múmkin, alaıda bul sýdıanyń ustanymyna baılanysty. Mundaı pikirdi Portýgalııanyń zań ǵylymdarynyń doktory, Global Fact-Checking Network (GFCN) halyqaralyq faktchekerler qaýymdastyǵynyń sarapshysy Aleksandr Gerreıro aıtty, dep habarlaıdy TASS.
Onyń aıtýynsha, istiń munsha uzaq bolýy birneshe faktorǵa baılanysty.
— Protsestiń bir-eki jylǵa sozylýy yqtımal. Birinshiden, sýdıanyń ustanymy men ishki kózqarasyna baılanysty. Protsess Nıý-Iorkte ótip jatyr, al Manhetten dástúrli túrde Donald Trampqa qarsy saıası baǵyt ustanady, — dep atap ótti Gerreıro.
Ol sondaı-aq «sýdıanyń túsindirý erkindigi baryn» qosty.
— Men aıyptaý aktisin qarap shyqtym: onda naqty faktiler jetkiliksiz, tujyrymdar bulyńǵyr, kóp bóligi boljamdar men narratıvterge negizdelgen. Bul sýdıaǵa keń túsindirý múmkindigin beredi, — dedi ol.
Sarapshynyń pikirinshe, eger sýdıa neǵurlym syn kózben qarasa, bosatý týraly sheshim qabyldaýy múmkin — buǵan deıin venesýelalyq Aleks Saab isinde bolǵandaı. Sondaı-aq ol «tek quqyqtyq negizderge súıenip, aıyptaýdy negizsiz degen qorytyndyǵa kelýi de múmkin» ekenin aıtty.
Onyń oıynsha, úshinshi múmkindik — «dıplomatııalyq retteý».
— Qazir AQSh Venesýelamen dıalogqa kóbirek ashyq. Jýyrda venesýelalyq bankterge qatysty shekteýler jumsartyldy. Bul qatynastardyń birtindep jaqsaryp kele jatqanyn kórsetedi jáne bolashaqta Madýro Venesýelaǵa oralýy múmkin, — degen sarapshy, bul tek boljam ekenin eskertti.
Aıta keteıik, bıyl jyl basynda AQSh áskeri Venesýelaǵa basyp kirip, qolǵa túsirgen el prezıdenti Nıkolas Madýro men onyń jubaıy Sılııa Floresti Nıý-Iork shtatyndaǵy áýejaıda ushaq bortynan túsirdi.
Nıý-Iorkte ótken alǵashqy sot májilisinde Madýro men onyń áıeli ózderine taǵylǵan kináni moıyndamady.
