Venesýelaǵa qarýmen qysym jasaý gýmanıtarlyq apatqa ákeledi — Brazılııa prezıdenti

ASTANA. KAZINFORM — Venesýelanyń ishki máselesine qarý arqyly qol suǵý aımaq úshin «gýmanıtarlyq apatqa» aınalyp, búkil álem úshin qaýipti jaǵdaı qalyptastyrady. Bul týraly senbi kúni Brazılııa prezıdenti Lýıs Inasıý Lýla da Sılva Ońtústik Amerıkanyń ortaq naryǵy — MERKOSÝR jáne qaýymdas elder basshylarynyń 67-sammıtinde sóılegen sózinde málimdedi, dep habarlaıdy Sınhýa.

«Latyn Amerıkasyna aımaqqa qatysy joq derjavanyń áskerı qysym jasaýy óńirdi eseńgiretedi», dedi L. I. Lýla da Sılva. 

Ol «gúldengen ári beıbit Ońtústik Amerıkany qurý — bizge saı keletin jalǵyz doktrına» ekenin atap ótti.

«Halyqaralyq quqyqtyń shekaralary synǵa túsip otyr. Venesýelaǵa qarýly kúsh kórsetý búkil jarty shar úshin gýmanıtarlyq apatqa aınalyp, álem úshin qaýipti pretsedent bolady», dep sózin tolyqtyrdy ol.

Brazılııa prezıdenti sondaı-aq jýyrda AQSh prezıdenti Donald Tramppen telefon arqyly bolǵan áńgimesinde oǵan kelissózder áskerı teketireske qaraǵanda áldeqaıda tıimdi ári az shyǵyndy jol ekenin aıtqanyn jetkizdi.

Donald Tramp ákimshiligi Venesýelaǵa baǵyttalǵan jáne elden shyǵatyn munaı tankerlerine tosqaýyl engizip, Venesýela prezıdenti Nıkolas Madýronyń úkimetin «sheteldik terrorıstik uıym» dep jarııalady.

Latyn Amerıkasynyń birqatar elderi men aımaqtyq uıymdary AQSh-tyń bul áreketterin aıyptap, dıalogqa shaqyrdy. Sondaı-aq olar BUU men halyqaralyq qaýymdastyqty tıisti sharalar qabyldaýǵa úndedi.

Eske sala ketsek, Tramp Venesýelaǵa qarsy teńiz blokadasyn engizdi. 

Al Venesýela bıligi BUU Qaýipsizdik Keńesi tótenshe otyrysyn ótkizýdi surady.