Venesýelaǵa qarsy áskerı operatsııaǵa 150 bombalaýshy, joıǵysh jáne barlaý ushaǵy qatysqan
ASTANA. KAZINFORM — AQSh Qarýly kúshteri Bas shtabynyń basshysy Den Keın Venesýelanyń astanasy Karakasqa jasalǵan shabýyl jáne el prezıdenti Nıkolas Madýrony ustaý operatsııasynyń egjeı-tegjeıin aıtty, dep habarlaıdy Anadoly.
Florıdada ótken baspasóz máslıhatynda Keın «Sońǵy sheshim» dep atalǵan operatsııany josparlaý men daıyndaý birneshe aıǵa sozylǵanyn jáne oǵan Ortalyq barlaý basqarmasy (TsRÝ) men Ulttyq qaýipsizdik agenttigi (UQA) qoldaý kórsetkenin málimdedi.
Onyń aıtýynsha, AQSh jeltoqsan aıynyń basynan beri beıbit turǵyndar arasyndaǵy shyǵyndy azaıtyp, tosynnan soqqy jasaý faktoryn barynsha paıdalaný úshin qolaıly kúndi kútken. Aýa raıy jaqsarǵan soń, prezıdent Donald Tramp jergilikti ýaqytpen saǵat 22:46–da operatsııany bastaý týraly buıryq bergen.
Keın tún ishinde Batys jarty shardaǵy qurlyqtaǵy jáne teńizdegi 20 túrli bazadan ushaqtar kóterilgenin aıtty. Jalpy alǵanda, operatsııaǵa 150 bombalaýshy, joıǵysh jáne barlaý ushaǵy qatysqan.
Onyń sózinshe, ushý quramyndaǵy eń jas áskerı qyzmetker 20 jasta, al eń úlkeni 49 jasta bolǵan. Tikushaqtar sý deńgeıinen shamamen 30 metr bıiktikte ushqan.
Operatsııa barysynda F-22, F-35 jáne B-1 úlgisindegi ushaqtar, sondaı-aq kóp mólsherde drondar paıdalanylǵan. Venesýela aýmaǵyna jaqyndaǵan kezde eldiń áýe qorǵanys júıeleri isten shyǵa bastaǵan. Ushý kezinde operatsııaǵa AQSh-tyń Ǵarysh qolbasshylyǵy men Kıberqolbasshylyǵy da qoldaý kórsetken.
Jergilikti ýaqytpen saǵat 02:01–de Karakasta Madýro kesheni tosynnan basyp alynǵan. Keınniń aıtýynsha, maqsatqa jetken kezde tikushaqtarǵa oq atylǵan, al olar zańdy ózin-ózi qorǵaý maqsatynda jaýap qaıtarǵan. AQSh-tyń bir ushaǵy zaqymdanǵanymen, ushýyn jalǵastyra alǵan.
General operatsııa barysynda barlaý bólimsheleri qurlyqtaǵy áskerge naqty ýaqyt rejıminde aqparat berip otyrǵanyn atap ótti. Nıkolas Madýro men onyń jubaıy Sılııa Flores berilip, AQSh Ádilet mınıstrligi tarapynan qamaýǵa alynǵan.
Keın AQSh tarapy bul operatsııa kezinde adam shyǵynyna ushyramaǵanyn rastady. Madýro men onyń jubaıy ustalǵannan keıin amerıkalyq ásker Venesýela aýmaǵynan shyǵaryla bastaǵan.
Evakýatsııa kezinde joıǵysh ushaqtar men drondar áýeden jáne atystyq qoldaý kórsetken. Onyń aıtýynsha, barlyq ushaq bazalaryna aman-esen oralǵan.
Eske sala ketsek, AQSh Venesýelaǵa jáne onyń kóshbasshysy, prezıdent Nıkolas Madýroǵa qarsy aýqymdy operatsııany sátti júrgizdi. Nátıjesinde Madýro jubaıymen birge ustalyp, elden evakýatsııalandy.
Venesýela prezıdenti Nıkolas Madýro men onyń áıeli Sılııa Floreske narkoterrorızmge qatysty, atap aıtqanda kokaın ákelý, pýlemetter men jarylǵysh qurylǵylardy saqtaý, AQSh-qa qarsy pýlemetter men jarylǵysh qurylǵylardy ıemdený úshin sóz baılasý aıyptary taǵyldy.
Venesýela vıtse-prezıdenti Delsı Rodrıges AQSh-tan Nıkolas Madýrony dereý bosatýdy talap etip, «Venesýela eshbir eldiń otary bolmaıdy» dep jarııa etti.
Al Ulybrıtanııa premer-mınıstri Kır Starmer óz eliniń AQSh-tyń Venesýeladaǵy áskerı operatsııaǵa eshqandaı qatysy joq ekenin, oǵan aralaspaǵanyn málimdedi.
Áskerı operatsııadan soń Donald Tramp AQSh Venesýelany basqaratynyn aıtty.
Qazirgi tańda Madýro men onyń jubaıy arnaıy ushaqpen Nıý-Iork shtatyna jetkizilip, ýaqytsha tergeý ızolıatoryna qamaldy.
Ókinishke qaraı AQSh-tyń Venesýelaǵa jasaǵan shabýyly saldarynan keminde 40 adam qaza tapty.
Budan bólek, Kolýmbııadaǵy venesýelalyq mıgranttar qýanyshtan Bogatada merekelik sherýge shyqty.
Degenmen birneshe eldiń bıligi AQSh-tyń Latyn Amerıkasy eline jasalǵan kólemdi shabýylynan keıin Venesýeladaǵy jaǵdaıǵa qatysty alańdaýshylyǵyn bildirdi.
Búgin Joǵarǵy sottyń sheshimine sáıkes, Delsı Rodrıges prezıdenttiń mindetin ýaqytsha atqaratyny anyqtaldy.