Venesýeladaǵy joıqyn jer silkinisinen mert bolǵandar sany 5 346 adamǵa jetti
ASTANA. KAZINFORM – Venesýelada 24 maýsymda bolǵan joıqyn jer silkinisterinen qaza bolǵandar sany 5 346 adamǵa jetti. Bılik kóz jumǵandardyń aty-jónderin anyqtaý men iz-túzsiz joǵalǵandardy izdestirý jumystaryn jalǵastyryp jatyr, dep habarlaıdy Anadoly.
Bul týraly Venesýela Ulttyq assambleıasynyń tóraǵasy Horhe Rodrıges áleýmettik jelidegi paraqshasynda málimdedi.
Onyń aıtýynsha, sońǵy málimet boıynsha kóz jumǵandar sany taǵy 68 adamǵa artyp, 5 346-ǵa jetken. Al jaraqat alǵandar sany 16 740 adamdy qurady.
Eldiń ulttyq buqaralyq aqparat quraldarynyń habarlaýynsha, Venesýela úkimeti jer silkinisinen qaza tapqandardyń aty-jónderin anyqtaý úshin eriktilerden DNQ úlgilerin tapsyrýdy surady.
Eldiń Sot medıtsınasy jáne krımınalıstıka ulttyq qyzmeti (Senamecf) men Іshki ister mınıstrligi taratqan birlesken málimdemede jaqyndary apattan eń kóp zardap shekken La-Gýaıra shtatynda nemese astana Karakastaǵy Bello-Monte máıithanasynda bolýy múmkin dep esepteıtin azamattardy DNQ úlgilerin tapsyrýǵa shaqyrdy.
Ázirge Venesýela bıligi iz-túzsiz joǵalǵandardyń resmı sanyn jarııalaǵan joq.
Jer silkinisinen keıin habar-osharsyz ketken adamdar týraly málimetter tirkeletin Desaparecidos Terremoto Venezuela («Venesýeladaǵy jer silkinisinen keıin iz-túzsiz joǵalǵandar») azamattyq bastamasynyń saıtynda 29 500 adamnyń iz-túzsiz ketkeni kórsetilgen.
Eske salaıyq, buǵan deıin Venesýelada bolǵan qýatty jer silkinisi saldarynan Karakas qalasynda turǵyn úıler qıraǵan edi. AQSh Geologııalyq qyzmetiniń málimetine sáıkes, jer silkinisiniń oshaǵy eldiń Karıb teńizi jaǵalaýyndaǵy Moron eldi mekeninen batysqa qaraı, Karakastan shamamen 168 shaqyrym jerde ornalasqan. Jer silkinisiniń oshaǵy 13 shaqyrym tereńdikte tirkelgen.
1 shildede Venesýela prezıdentiniń mindetin atqarýshy Delsı Rodrıges jer silkinisi qurbandaryn aza tutý úshin elde jeti kúndik ulttyq qaraly kún jarııalaǵan bolatyn.
Venesýeladaǵy jer silkinisinen qaza tapqandar sany 5,2 myńnan asty.
