Venesýeladaǵy joıqyn jer silkinisinen qaza tapqandar sany 4 myń adamnan asty
ASTANA. KAZINFORM — Venesýeladaǵy joıqyn jer silkinisi saldarynan qaza tapqandar sany 4 118 adam boldy. El bıligi myńdaǵan adamnyń zardap shekkenin, kóp ǵımarattyń qıraǵanyn jáne aýqymdy qutqarý jumystarynyń jalǵasyp jatqanyn málimdedi, dep habarlaıdy Kazinform agenttigi TASS-qa silteme jasap.
Bul týraly Bolıvarıan Respýblıkasynyń Ulttyq assambleıasynyń (parlament) tóraǵasy Horhe Rodrıges habarlady.
Rodrıges óziniń Telegram-kanalynda úkimettiń kúndelikti málimetin jarııalady. Onda tabıǵı apat saldarynan 16 740 adam jaraqat alǵany, 17 907 adam baspanasyz qalǵany aıtylǵan. Sonymen qatar 190 ǵımarat tolyq qırap, taǵy 856 ǵımaratqa aıtarlyqtaı zaqym kelgen.
Іzdestirý-qutqarý jumystary kezinde 6 462 adam qutqaryldy. 29 966 adam aýrýhanalar men medıtsınalyq mekemelerde em qabyldaǵan. Zardap shekken 86 794 otbasyǵa kómek kórsetilip, olarǵa 9 766 tonna azyq-túlik jetkizilgen.
Eske salaıyq, 2026 jylǵy 24 maýsymda Venesýelada araǵa nebári 39 sekýnd salyp magnıtýdasy 7,2 jáne 7,5 bolatyn eki joıqyn jer silkinisi tirkeldi. BUU Damý baǵdarlamasynyń baǵalaýynsha, tabıǵı apattan kelgen ekonomıkalyq shyǵyn shamamen 6,7 mıllıard dollar boldy. Qazirgi ýaqytta izdestirý-qutqarý jumystary jalǵasyp jatyr.
Buǵan deıin 3 889 adam qaza tapqanyn, al 16 740 adamnyń jaralanǵanyn habarlaǵan edik.
