Venesýeladaǵy joıqyn jer silkinisi saldarynan qurban bolǵandar sany 5,3 myńnan asty
ASTANA. KAZINFORM – Venesýelada bolǵan joıqyn jer silkinisinen qaza bolǵandar sany 5 398 adamǵa jetti. Myńdaǵan turǵyn jaraqat alyp, baspanasyz qaldy, dep habarlaıdy reseılik TASS.
Bul týraly el Ulttyq assambleıasynyń (parlament) tóraǵasy Horhe Rodrıges óziniń Telegram arnasynda málimdedi.
Ol jarııalaǵan úkimettiń kúndelikti málimetine sáıkes, tabıǵı apat saldarynan 16 740 adam jaraqat alǵan. Taǵy 17 907 turǵyn baspanasynan aıyrylǵan.
Jer silkinisi saldarynan 190 ǵımarat tolyq qırady. Al 856 nysanǵa eleýli zaqym kelgen.
Іzdestirý-qutqarý jumystary barysynda 6 462 adam aman-esen qutqaryldy. Medıtsınalyq mekemelerde 44 298 adamǵa em kórsetildi.
Memleket tarapynan 128 324 otbasyǵa kómek berildi. Ýaqytsha uıymdastyrylǵan 107 lagerge 23 335 adam ornalastyryldy. Zardap shekken turǵyndarǵa jalpy kólemi 10 964 tonnadan astam azyq-túlik jetkizildi.
Eske sala keteıik, Venesýelada bolǵan qýatty jer silkinisi saldarynan Karakas qalasynda turǵyn úıler qıraǵan bolatyn.
AQSh Geologııalyq qyzmetiniń málimetinshe, jer silkinisiniń epıtsentri eldiń Karıb teńizi jaǵalaýyndaǵy Moron eldi mekeninen batysqa qaraı, al Karakastan shamamen 168 shaqyrym batysta ornalasqan. Jer silkinisiniń oshaǵy 13 shaqyrym tereńdikte tirkeldi.
1 shildede Venesýela Prezıdentiniń mindetin atqarýshy Delsı Rodrıges jer silkinisi qurbandaryn aza tutý maqsatynda elde jeti kúndik ulttyq qaraly kún jarııalaǵan edi.
