Venesýeladaǵy joıqyn jer silkinisi: BUU álem elderin kómekke shaqyrdy

Venesýelada bolǵan eki joıqyn jer silkinisinen 188 adam qaza taýyp, 1 500-den astamy jaraqat aldy. Myńdaǵan adam iz-túzsiz joǵalǵandar qatarynda. Bul tabıǵı apat eldegi gýmanıtarlyq daǵdarysty odan ári ýshyqtyrdy. Osyǵan baılanysty Birikken Ulttar Uıymy halyqaralyq qaýymdastyqqa shuǵyl úndeý jasady. AQSh, Ispanııa, Kolýmbııa jáne basqa da birqatar memleket kómek kórsetýge daıyn ekenderin málimdedi.

— Elge aýyr zardap ákelgen joıqyn jer silkinisterinen keıin Venesýela halqyna qoldaý kórsetý úshin barlyq múmkindigimizdi jumyldyryp otyrmyz, — dedi BUU-nyń gýmanıtarlyq operatsııalar jónindegi basshysy Tom Fletcher BUU-nyń Gýmanıtarlyq máselelerdi úılestirý basqarmasy (OCHA) taratqan málimdemede.

Magnıtýdasy 7,2 jáne 7,5 bolǵan eki jer silkinisi bir mınýt aralyqpen tirkelip, kóptegen ǵımarattyń qıraýyna, elektr energııasynyń óshýine jáne eldiń basty áýejaıynyń jabylýyna sebep boldy. Turǵyndardyń aıtýynsha, onsyz da kúrdeli áleýmettik-ekonomıkalyq jaǵdaıda jumys istep jatqan tótenshe jaǵdaı qyzmetteri qajetti resýrstardyń tapshylyǵyna tap bolǵan.

Qazirgi ýaqytta qutqarýshylar úıindiler astynan tiri qalǵan adamdardy izdeý jumystaryn jalǵastyrýda. Al BUU-nyń Gýmanıtarlyq máselelerdi úılestirý basqarmasy halyqaralyq qalalyq izdestirý-qutqarý jasaqtarynyń jumysyn úılestirip jatyr.

Venesýela bıligi elde tótenshe jaǵdaı jarııalap, mektepterdegi sabaqtardy toqtatty. Bilim berý mekemeleri ýaqytsha baspanalar men gýmanıtarlyq kómek qabyldaý pýnktteri retinde paıdalanylady.

Jer silkinisiniń dúmpýi ásirese Karakas qalasynda jáne Falkon sekildi jaǵalaýdaǵy shtattarda qatty sezildi. Bul óńirlerde qulaǵan ǵımarattardyń astynda áli de adamdar qalyp qoıǵan. BUU gýmanıtarlyq uıymdarǵa halyqaralyq qoldaýdy shuǵyl túrde kúsheıtý qajet ekenin atap ótti. Uıymnyń málimetinshe, aldaǵy saǵattarda qaza tapqandar sany áli de artýy múmkin.

Venesýela prezıdentiniń mindetin atqarýshy Delsı Rodrıgestiń teleúndeýinde habarlanǵandaı, qazirgi ýaqytta BUU sertıfıkattaǵan qutqarý jasaqtary tiri qalǵandardy izdeýge kómektesý úshin elge attanady.

Ispanııa men Frantsııa ondaǵan maman jiberýge ýáde berse, Germanııa alty áskerı-kólik ushaǵyn bóldi. Al Shveıtsarııa 80 mamandy, segiz izdestirý-qutqarý ıtin jáne 18 tonna arnaıy tehnıkany múmkindiginshe tezirek Venesýelaǵa jóneltý úshin jumyldyrdy.

Nıderlandtyń syrtqy saýda mınıstri Sorrd Sordsma izdestirý-qutqarý jasaǵyn jiberýge arnalǵan 2 mıllıon eýro kólemindegi kómek paketin jarııalady. Chehııa da óz qutqarýshylar tobynyń Venesýelaǵa attanýǵa daıyndalyp jatqanyn málimdedi.

Halyqaralyq qaýymdastyq Venesýelaǵa qoldaý bildirip jatyr

AQSh Memlekettik hatshysy Marko Rýbıo X áleýmettik jelisindegi paraqshasynda óz eliniń atynan Venesýela halqyna «tereń qaıǵyra kóńil aıtty».

— Prezıdent Donald Tramptyń tapsyrmasy boıynsha AQSh Memlekettik departamenti Venesýelaǵa jedel túrde izdestirý-qutqarý toptaryn, medıtsınalyq resýrstar men gýmanıtarlyq kómekti jiberip jatyr, — dep jazdy Marko Rýbıo.

Óz kezeginde Rım Papasy Lev XIV Venesýelaǵa 100 myń eýro kóleminde qarjylaı kómek bóldi. Bul qarajat Qasıetti Taqtyń qaıyrymdylyq bastamalaryna jaýap beretin Apostoldyq elemozınarııa qory arqyly aýdaryldy.

Ispanııa astanasy Madrıdten el úkimetiniń tóraǵasy Pedro Sanches Venesýela halqyna óziniń jáne búkil Ispanııanyń tolyq qoldaýyn bildirdi. Ol «joıqyn túngi jer silkinisterinen keıin ıspan halqynyń oıy men tilegi zardap shekkender men olardyń otbasylarymen birge ekenin» atap ótti.

Kórshiles Kolýmbııanyń saılanǵan prezıdenti Abelardo de la Esprıelıa da X jelisinde Venesýela halqymen yntymaqta ekenin jetkizdi.

— Kolýmbııa osy qıyn sátte sizdermen birge. Biz sizderdi jylylyqpen, qurmetpen jáne úmitpen qoldaımyz. Qaza tapqandar men olardyń otbasylary úshin duǵa etemin. Qudaı sizderdi jalǵyz qaldyrmaıdy, — dedi ol.

Frantsııa prezıdenti Emmanýel Makron da áleýmettik jeli arqyly Venesýela prezıdenti Delsı Rodrıgespen sóıleskenin habarlady. Onyń aıtýynsha, Frantsııadan 85 izdestirý-qutqarý mamanynan quralǵan top Ońtústik Amerıka eline shuǵyl attandyrylyp jatyr.

— Frantsııa eýropalyq seriktesterimen birge Venesýela bıliginiń suranysyna sáıkes zardap shekken halyqqa qajetti kómekti kórsetýge daıyn, — dep jazdy Makron.

Tipti AQSh pen Izraılmen áskerı qaqtyǵys jaǵdaıyndaǵy Iran da Venesýelaǵa kómek kórsetýge daıyn ekenin málimdedi. Eldiń Syrtqy ister mınıstrliginiń resmı ókili Esmaıl Bakaı arnaıy málimdemesinde izdestirý-qutqarý jáne gýmanıtarlyq operatsııalarǵa qajetti barlyq kómekti usynatynyn aıtyp, Venesýela úkimeti men halqymen yntymaqta ekenin jetkizdi.

Buǵan deıin habarlanǵandaı, Venesýelada 7,1 baldyq jer silkinisi tirkeldi.