Venesýeladaǵy jer silkinisinen qaza tapqandar sany 920 adamǵa jetti
ASTANA. KAZINFORM — Venesýelada bolǵan joıqyn jer silkinisteri saldarynan qaza tapqandar sany 920 adamǵa jetti, dep habarlaıdy CNN.
Bul týraly jýrnalısterge el parlamentiniń spıkeri Horhe Rodrıges málimdedi.
Buǵan deıin eldiń ýaqytsha prezıdenti Delsı Rodrıges 589 adamnyń qaza taýyp, 2890 adamnyń jaralanǵanyn habarlaǵan bolatyn. Bılik ókilderiniń aıtýynsha, úıindilerdi arshý jumystary jalǵasyp jatqandyqtan, qaza tapqandar sany áli de artýy múmkin. Qutqarýshylar úıindi astynan kóz jumǵan adamdardyń denelerin jıi taýyp jatyr.
Venesýelada sársenbi keshi men beısenbi tańynda magnıtýdasy 7,2, 7,5 jáne 4,5 bolatyn birneshe jer silkinisi tirkelip, kóptegen turǵyn úı qırady. Elde tótenshe jaǵdaı rejımi engizilip, eń kóp zardap shekken La-Gýaıra shtaty áskerı kúshterdiń baqylaýyna berildi.
Qazirgi ýaqytta Venesýela halyqaralyq uıymdar men túrli memleketterdiń gýmanıtarlyq kómegin qabyldap jatyr.
Eske salaıyq, buǵan deıin Venesýladaǵy jer silkinisinen qaza tapqandar sany 235 adamǵa jetkeni habarlanǵan edi.
Sondaı-aq Qazaqstan Prezıdenti Qasym-Jomart Toqaev Venesýelanyń ýaqytsha prezıdenti Delsı Rodrıgeske kóńil aıtý jedelhatyn joldady.
