Venesýeladaǵy jer silkinisinen qaza tapqandar sany 6,5 myńnan asty
ASTANA. KAZINFORM – Venesýelada 24 maýsym kúni keshke bolǵan eki jer silkinisinen qaza tapqandar sany 6509 adamǵa jetti. Bul týraly 25 tamyzda eldiń Ulttyq assambleıasynyń tóraǵasy Horhe Rodrıges Telegram arnasynda málimdedi, dep habarlaıdy DW basylymy.
Onyń málimetinshe, aýrýhanalarda 226 696 zardap shegýshige medıtsınalyq kómek kórsetilgen.
Іzdeý-qutqarý jumystary barysynda 6462 adam úıindi astynan tiri tabylǵan. Bul kórsetkish keminde shildeniń ortasynan beri ózgermegen. La-Gýaıra jaǵalaý shtatynda qaza tapqandardyń denelerin úıindi astynan shyǵarý jumystary áli jalǵasyp jatyr.
Sarapshylardyń baǵalaýynsha, habar-osharsyz ketkender sany 10 myńǵa deıin jetýi múmkin.
Jer silkinisteri saldarynan keminde 190 ǵımarat qıraǵan. Bıliktiń málimetinshe, baspanasynan aıyrylǵandarǵa turaqty turý úshin 335 oryn berildi. AFP agenttiginiń habarlaýynsha, jyl sońyna deıin bul kórsetkishti 4 myńǵa jetkizý josparlanyp otyr.
«Seısmıkalyq dýplet»
Aldymen Venesýelada magnıtýdasy 7,2 bolatyn jer silkinisi tirkelip, arada bir mınýt ótpeı magnıtýdasy 7,5 ekinshi zilzala bolǵan. Mundaı qubylys «seısmıkalyq dýplet» dep atalady.
24 maýsym kúni jergilikti ýaqytpen saǵat 18:00 shamasynda bolǵan alǵashqy jer silkinisiniń epıtsentri Karıb teńizi jaǵalaýyndaǵy Moron qalasynan batysqa qaraı 28 shaqyrym, Karakastan shamamen 168 shaqyrym jerde ornalasqan. Jer silkinisiniń oshaǵy 13 shaqyrym tereńdikte bolǵan.
Ekinshi jer silkinisiniń epıtsentri Moronnan 16 shaqyrym jerde, al oshaǵy 10 shaqyrym tereńdikte tirkelgen.
Zilzala saldaryn joıý úshin Venesýela bıligi Halyqaralyq valıýta qoryndaǵy óz resýrstarynan 346 mln dollar paıdalanǵan. Bul týraly shildeniń ortasynda Venesýela prezıdentiniń mindetin atqarýshy Delsı Rodrıges málimdegen edi.
Ol 1 shildede jer silkinisi qurbandaryn eske alýǵa baılanysty elde jeti kúndik aza tutý jarııalady. Sol kezde qaza tapqandardyń resmı sany shamamen 2300 adam bolǵan.
Eske sala ketsek, buǵan deıin Venesýeladaǵy qos jer silkinisinen keıin bir aı ótkendegi derekke sáıkes qaza tapqandar sany 5,5 myńnan asqanyn jazdyq.
