Venesýeladaǵy jer silkinisinen qaza tapqandar sany 5,2 myńnan asty

Venesýela Ulttyq assambleıasynyń tóraǵasy Horhe Rodrıgestiń málimetinshe, tabıǵı apat qurbandarynyń sany taǵy 89 adamǵa artqan.

Sońǵy derek boıynsha, 16 740 adam jaraqat alǵan.

Ýaqytsha ornalastyrý ortalyqtarynda 23 820 turǵyn qalyp otyr. Al 128 324 otbasyǵa gýmanıtarlyq kómek kórsetilgen.

Eldiń ulttyq buqaralyq aqparat quraldarynyń habarlaýynsha, jer silkinisinen keıin óńirde 1 388 aftershok tirkelgen.

Venesýelanyń Qorshaǵan orta mınıstrligi eń kóp zardap shekken La-Gýaıra qalasynyń jaǵalaý aımaǵyn tazartý jáne qalpyna keltirýge baǵyttalǵan «Ekologııalyq qalpyna keltirý josparynyń» júzege asyrylyp jatqanyn málimdedi.

Baǵdarlama aıasynda tabıǵı tepe-teńdik pen jaǵalaý ekojúıesin qalpyna keltirý úshin óńirge tán ósimdik túrleri otyrǵyzylady.

Qorshaǵan orta mınıstri Nelson Rodrıgestiń aıtýynsha, jer silkinisterinen keıin óńirde shamamen 2 mln 106 myń tonna qurylys qaldyqtary paıda bolǵan. Bul baǵalaý Venesýela úkimeti men BUU Damý baǵdarlamasynyń (UNDP) birlesken modeldeý jumystarynyń nátıjesinde jasalǵan.

Eske salaıyq, buǵan deıin Venesýelada bolǵan kúshti jer silkinisi Karakas qalasyndaǵy turǵyn úılerdi qıratyp, aıtarlyqtaı shyǵyn keltirgen edi. AQSh Geologııalyq qyzmetiniń (USGS) málimetinshe, jer silkinisiniń epıtsentri Karıb teńizi jaǵalaýyndaǵy Moron eldi mekeninen batysqa qaraı, Karakastan shamamen 168 shaqyrym qashyqtyqta ornalasqan. Jer silkinisiniń oshaǵy 13 shaqyrym tereńdikte bolǵan.

Sondaı-aq 1 shildede Venesýela prezıdentiniń mindetin atqarýshy Delsı Rodrıges jer silkinisi qurbandaryn aza tutý maqsatynda elde jeti kúndik ulttyq aza tutý jarııalaǵan bolatyn.

Aıta keteıik, osyǵan deıin Iranda eki ret jer silkindi.