Venesýeladaǵy jer silkinisinen qaza tapqandar sany 5 myńnan asty
ASTANA. KAZINFORM — Venesýeladaǵy joıqyn jer silkinisi saldarynan qaza tapqandar sany 5 069 adamǵa jetti. Bul týraly eldiń Ulttyq assambleıasynyń tóraǵasy Horhe Rodrıges Telegram-arnasynda málimdedi, dep jazady Report.
Jarııalanǵan úkimettiń kúndelikti málimetine sáıkes, 16 740 adam jaraqat alyp, al 17 907 turǵyn baspanasyz qalǵan. Sonymen qatar 190 ǵımarat tolyqtaı qırap, taǵy 856 ǵımaratqa eleýli zaqym kelgen.
Іzdeý-qutqarý jumystary barysynda 6 462 adam qutqarylyp, 36 951 adamǵa medıtsınalyq mekemelerde kómek kórsetildi.
Sonymen birge 128 324 otbasy gýmanıtarlyq kómek alǵan, 21 235 adam 107 ýaqytsha lagerge ornalastyryldy. Zardap shekkenderge jalpy kólemi 10 063 tonna azyq-túlik taratyldy.
Eske salaıyq, Venesýelada joıqyn jer silkinisi 24 maýsym kúni keshke boldy. Shamamen 40 sekýnd aralyqpen magnıtýdasy 7,2 jáne 7,5 bolatyn eki jerasty dúmpýi tirkeldi. Jer silkinisteriniń epıtsentrleri ıArakýı shtatynda bir-birinen shamamen 10 shaqyrym qashyqtyqta ornalasqan. Tabıǵı apattan keıin 1 331 aftershok tirkeldi.
