Venesýeladaǵy jer silkinisinen qaza tapqandar sany 188 adamǵa jetti
ASTANA. KAZINFORM — Venesýelada bolǵan eki qýatty jer silkinisiniń saldarynan qaza tapqandar sany 188 adamǵa jetti. Taǵy 1520 adam jaraqat alǵan. Bul týraly Kazinform agenttigi VTV telearnasyna silteme jasap habarlady.
Venesýela Ulttyq assambleıasynyń spıkeri Horhe Rodrıges jer silkinisi qurbandarynyń sany 188 adamǵa deıin artqanyn málimdedi.
— 1520 adam jaraqat alyp, aýrýhanalarǵa jetkizildi. Olarǵa qajetti medıtsınalyq kómek kórsetilip jatyr, — dedi ol VTV telearnasy arqyly jasaǵan úndeýinde.
Sonymen qatar 157 adam iz-túzsiz joǵalǵandar qatarynda qalyp otyr, al 200-den astam adam qıraǵan ǵımarattardyń úıindileri astynda bolýy múmkin. Qazirgi ýaqytta izdestirý-qutqarý jumystary jalǵasyp jatyr.
Tabıǵı apat saldarynan segiz aýrýhana, 20 saýda ortalyǵy jáne 68 ınfraqurylym nysany zaqymdandy. Jalpy sany 250 ǵımarat búlinip nemese tolyq qıraǵan. Keıbir medıtsınalyq mekemeler evakýatsııalandy.
Eske salsaq, 24 maýsym kúni jergilikti ýaqyt boıynsha saǵat 18:04-te Venesýelada magnıtýdasy 7,2 bolatyn alǵashqy jer silkinisi tirkeldi. Onyń oshaǵy 13 shaqyrym tereńdikte ornalasyp, epıtsentri astanadan 200 shaqyrym qashyqtyqtaǵy Moron qalasy mańynda bolǵan.
Odan keıin kóp uzamaı jer betine jaqyn, nebári 10 shaqyrym tereńdikte magnıtýdasy 7,5 bolatyn ekinshi kúshti jer silkinisi oryn aldy.
United States Geological Survey (AQSh Geologııalyq qyzmeti) málimetinshe, magnıtýdasy 7,5 bolǵan bul jer silkinisi 1900 jyldan beri Venesýelada tirkelgen eń qýatty zilzala sanalady.
Sondaı-aq vedomstvonyń boljamyna sáıkes, jer silkinisi qurbandarynyń sany 44 paıyz yqtımaldyqpen 10 myńnan 100 myń adamǵa deıin jetýi múmkin.
Buǵan deıin Venesýeladaǵy jer silkinisinen qaza tapqandar sany 160 adamnan asqany habarlanǵan edi.
