Venesýeladaǵy jer silkinisinen qaza tapqandar sany 160-tan asty
ASTANA.KAZINFORM — Venesýeladaǵy jer silkinisinen qaza tapqandar sany 164-ke jetti, taǵy 971 adam jaraqat aldy, dep habarlaıdy CNN.
Bul týraly Venesýela prezıdentiniń mindetin atqarýshy Delsı Rodrıges málimdedi.
Ol bılik eldiń basqa aımaqtaryndaǵy qutqarý toptaryn Karakastyń soltústigine qaraı ornalasqan La-Gýaıra aýdanyna ornalastyryp jatqanyn málimdedi.
— Ol jaqta ondaǵan ǵımarat qırady jáne biz qazirgi ýaqytta adamdardyń ómirin saqtap qalý úshin qarqyndy qutqarý jumystaryn júrgizip jatyrmyz, — dedi Venesýela prezıdentiniń mindetin atqarýshy.
Bılik qutqarý jumystary jalǵasyp jatqandyqtan, qaza tapqandar sany odan ári artýy múmkin dep alańdaıdy.
Esterińizge sala keteıik, 24 maýsymda jergilikti ýaqyt boıynsha saǵat 18:04–te Venesýelada alǵashqy jer silkinisi tirkeldi. El astanasynan 200 shaqyrym jerdegi Moron qalasynda 13 shaqyrym tereńdikte 7,2 magnıtýdaly jer silkinisi boldy. Birden jer betine jaqyn jerde, nebári 10 shaqyrym tereńdikte 7,5 magnıtýdaly taǵy bir jer silkinisi boldy.
AQSh Geologııalyq qyzmetiniń (USGS) málimetinshe, 7,5 baldyq jer silkinisi 1900 jyldan bergi eldegi eń kúshti jer silkinisi boldy.
Buǵan deıin Venesýelada qýatty jer silkinisinen ondaǵan adam qaza taýyp, júzdegen adam jaraqat alǵany habarlanǵan.
