Venesýeladaǵy shahta apatynan 15 adam qaza tapty
ASTANA. KAZINFORM – Venesýelanyń Bolıvar shtatyndaǵy «Býlıa Loka» zańsyz kenishiniń qulaýy saldarynan 15 adam qaza taýyp, 11 adam jaraqat aldy, dep habarlaıdy RBK el prezıdenti Nıkolas Madýronyń X paraqshasyna silteme jasap.
«Ókinishke qaraı, zańsyz shahtanyń qulaýy kezinde qaza tapqan adamdardyń týystary men jaqyndaryna kóńil aıtamyn», - dedi Madýro.
Bolıvar gýbernatory Anhel Markano shahtadaǵy operatsııaǵa qatysatyn qutqarýshylar kúsheıtiletinin aıtty.
Apat 20 aqpan kúni bolǵan. Kenish alty aı boıy kontrabandashylarǵa toly aımaqta jumys istedi, dep habarlaıdy El Pais.
Qutqarýshylar kelgenshe aman qalǵan kenshiler áriptesterin úıindi astynan qutqarmaq bolǵan. Býlıa Loka ornalasqan Angostýra meri keminde 30 adam qaza taýyp, 100-den astam adam jaralanǵanyn habarlady. Shahtanyń bir bóligi 35 metr tereńdikte opyrylǵan.
