Venesýeladaǵy prezıdent rezıdentsııasynyń mańynda atys boldy
ASTANA.KAZINFORM - Venesýela astanasy Karakastaǵy prezıdent saraıynyń mańynda atys boldy, dep habarlaıdy TASS.
Noticias Caracol radıostantsııasy aımaqtaǵy memlekettik mekemelerdiń evakýatsııalanǵanyn habarlady. Drondar aımaqtyń ústinen ushyp, áýe qorǵanysyn iske qosqan bolýy múmkin.
Aıta keteıik, 3 qańtarda AQSh Venesýelaǵa qarsy operatsııa bastap, prezıdent Nıkolas Madýro men onyń áıelin tutqyndady. Keıinirek AQSh prezıdenti Donald Tramp Madýro men onyń áıeli Nıý-Iorkke kememen jetkiziletinin jarııalady.
Nıkolas Madýro men onyń áıeli Sılııa Floreske esirtki terrorızmin uıymdastyrdy, kokaın ımporttaýǵa jáne AQSh-qa qarsy pýlemetter men jarylǵysh qurylǵylar saqtaý isine qatysty degen aıyp taǵyldy.
Sol kúni Venesýelanyń Joǵarǵy Soty vıtse-prezıdent Delsı Rodrıgeske tolyq prezıdenttik ókilettik berdi.
Delsı Rodrıges Venesýelanyń ýaqytsha prezıdenti retinde ant berdi.
6 qańtarda Madýro men onyń áıeli Brýklındegi Metropolıten ustaý ortalyǵynan tikushaqpen Manhettendegi tikushaq alańyna kúsheıtilgen kúzetpen jetkizildi. Sodan keıin tyńdaýdan birneshe saǵat buryn kortejben sot ǵımaratyna jetkizildi. Bılikten qýylǵan Venesýela kóshbasshysy men onyń áıeli kinásin moıyndamady. Kelesi sot tyńdaýy 17 naýryzda ótedi.
Buǵan deıin BUU Bas hatshysy jáne birneshe eldiń bıligi AQSh bastaǵan Latyn Amerıkasy eline jasalǵan iri áýe shabýylynan keıin Venesýeladaǵy jaǵdaıǵa alańdaýshylyq bildirgen bolatyn.