Venesýeladaǵy qos jer silkinisinen keıin bir aı: qaza tapqandar sany 5,5 myńnan asty
ASTANA. KAZINFORM — 24 maýsymda Venesýelanyń soltústiginde araǵa nebári 39 sekýnd salyp magnıtýdasy 7,2 jáne 7,5 bolatyn eki jer silkinisi bolǵanyna bir aı ótti. Bılik bul qubylysty sırek kezdesetin seısmıkalyq «dýblet» dep ataǵan edi. Alaıda tabıǵı apat keıingi aptalarda eldiń sońǵy júz jyldan astam ýaqyttaǵy eń aýyr zilzalalarynyń birine aınaldy, dep habarlaıdy Euronews.
Sońǵy resmı málimetke sáıkes, apat saldarynan 5 546 adam qaza taýyp, 16 740 adam jaraqat alǵan. Jaralanǵandar sany birneshe aptadan beri aıtarlyqtaı ózgermegenimen, úıindilerdi arshý jáne máıitterdi sáıkestendirý jumystary jalǵasqandyqtan, qaza tapqandar sany artyp keledi.
Sonymen qatar Venesýela bıligi iz-túzsiz joǵalǵandar týraly málimetti 25 maýsymnan beri jańartqan joq. Sol kezde 157 adamnyń joǵalǵany habarlanǵan bolatyn. Al azamattyq bastama negizinde qurylǵan Desaparecidos del Terremoto de Venezuela tiziminde qazirgi tańda shamamen 29 500 adamnyń naqty qaıda ekeni belgisiz ekeni kórsetilgen. Bul memlekettik jáne qoǵamdyq derekter arasyndaǵy úlken aıyrmashylyq tótenshe jaǵdaıdy basqarýdaǵy eń daýly máselelerdiń birine aınaldy.
Jer silkinisi el ekonomıkasyna da orasan zııan keltirdi. Dúnıejúzilik banktiń baǵalaýynsha, tikeleı materıaldyq shyǵyn 19,6 mlrd dollardy qurady. Onyń ishinde 9,3 mlrd dollar turǵyn úı sektoryna, 5,2 mlrd dollar aýrýhanalar, mektepter jáne basqa da memlekettik ınfraqurylym nysandaryna, al 5 mlrd dollarǵa jýyǵy kommertsııalyq jáne ónerkásiptik ǵımarattarǵa tıesili.
Resmı málimet boıynsha:
856 ǵımarat zaqymdanǵan, onyń 190-y tolyq qıraǵan;
17 907 otbasy baspanasyz qalǵan;
23 122 adam Karakas pen La-Gýaırada qurylǵan 107 ýaqytsha lagerde turyp jatyr;
Tótenshe jaǵdaı bastalǵaly beri 128 324 otbasy memlekettik kómek alǵan.
Negizgi jer silkinisinen keıin 1 405 aftershok tirkelip, olardyń birqatary álsiregen ǵımarattarǵa qosymsha qaýip tóndirdi.
Qazir izdestirý-qutqarý jumystarynyń ornyna úıindilerdi tazartý men qalpyna keltirý kezeńi bastaldy. Bılik bul jumystardyń birneshe aıǵa, tipti jyldarǵa sozylýy múmkin ekenin moıyndaıdy.
La-Gýaıranyń keıbir aýdandarynda elektr energııasy eki aptadan keıin qaıta qosylǵanymen, qalypty ómir tolyq qalpyna kelgen joq. «Shekarasyz dárigerler» uıymy óńirde mobıldi medıtsınalyq klınıkalardyń jumysyn jalǵastyryp, memlekettik densaýlyq saqtaý júıesine qoldaý kórsetip jatyr.
Apat Venesýeladaǵy saıası ótpeli kezeńmen tuspa-tus keldi. Jyl basynda burynǵy prezıdent Nıkolas Madýro ustalǵannan keıin ýaqytsha úkimetti Delsı Rodrıges basqaryp otyr. Elde jańa saılaýdyń naqty kúni áli belgilengen joq.
Sarapshylardyń pikirinshe, halyqaralyq kómektiń uıymdastyrylýy, sonyń ishinde AQSh qoldaýymen Venesýela aktıvterin buǵattan shyǵarý jáne basqa eldermen yntymaqtastyq eldi qalpyna keltirý qarqynyna eleýli yqpal etedi.
Aıta ketelik Venesýelada 7,1 baldyq jer silkinisi tirkelgen edi.
