Venesýelada jeti kúndik ulttyq aza tutý jarııalandy

ASTANA. KAZINFORM –  Venesýelanyń ýaqytsha prezıdenti Delsı Rodrıges AQSh qarýly kúshteriniń operatsııasy barysynda qaza tapqan qaýipsizdik qyzmetkerlerin eske alý maqsatynda elde jeti kúndik ulttyq aza tutý kúnin jarııalaǵanyn málimdedi, dep habarlaıdy Euronews.

Amerıkalyq reıd saldarynan Venesýelanyń kúshtik qurylymdarynyń keminde 24 qyzmetkeri, sondaı-aq 30-dan astam kýbalyq áskerı qyzmetshi qaza tapqan. Kýbada osyǵan baılanysty 5 jáne 6 qańtar kúnderi aza jarııalanǵan bolatyn.

— Munda soǵys joq, óıtkeni biz soǵys jaǵdaıynda turǵan joqpyz. Biz — shabýylǵa ushyraǵan beıbit elmiz. Biz beıbitshilik jolymen júrýdi jalǵastyramyz. Búkil venesýelalyq halyq ulttyq birlikte. Bolashaǵymyz úshin eńbek etip, tarıhymyz ben qadir-qasıetimizdi qorǵaı otyryp, bárimiz birge tótep bereıik, — dedi Venesýelanyń ýaqytsha prezıdenti Delsı Rodrıges.

Operatsııa nátıjesinde Venesýela prezıdenti Nıkolas Madýro men onyń jubaıy ustalyp, AQSh-qa áketilgen.

Nıkolas Madýro Nıý-Iorkte esirtki saýdasyna qatysty aıyptar boıynsha sot aldyna tartyldy. Nıý-Iorktegi alǵashqy sot otyrysynda Madýro men onyń jubaıy ózderin kináli dep moıyndaǵan joq.