Venesýelada jeti kúndik aza tutý jarııalandy
ASTANA.KAZINFORM — 24 maýsym kúngi Venesýeladaǵy eki birdeı jer silkinisinen 2295 adam qaza taýyp, 11 myńnan astam adam jaraqat aldy, dep habarlady jergilikti bılik. Elde jeti kúndik aza tutý jarııalandy, dep habarlaıdy DW.
Ulttyq Assambleıa tóraǵasy Horhe Rodrıgestiń aıtýynsha, 25 maýsym túninde Venesýelada bolǵan eki jer silkinisinen qaza tapqandar sany 2295-ke jetti. Qazirgi ýaqytta 11 267 adam jaraqat alyp, shamamen 13 000 adam baspanasyz qalǵany belgili.
BUU sonymen qatar shamamen 50 000 adamnyń iz-túzsiz joǵalǵanyn tirkedi. Rodrıgestiń aıtýynsha, olardyń shamamen 30 000-y eń kóp shyǵynǵa ushyraǵan La-Gýaıra port aımaǵynda bolýy múmkin. Ol qutqarýshylar úıindiler astynan shamamen 6500 adamdy qutqarǵanyn atap ótti, saıasatker tiri qalǵandar sany 20 000-ǵa jetýi múmkin dep sanaıdy, óıtkeni kópshiligi óz betinshe nemese jaqyndarynyń kómegimen qashyp qutyldy.
Elde jeti kúndik aza tutý jarııalandy
1 shildede Venesýela prezıdentiniń mindetin atqarýshy Delsı Rodrıges jer silkinisiniń qurbandary úshin jeti kúndik ulttyq aza tutý kúnin jarııalady. Ol sol kúni jergilikti ýaqyt boıynsha saǵat 18:00–de kúshine endi.
— Venesýela joıqyn jer silkinisi saldarynan bolǵan jappaı adam shyǵynyn bastan ótkerip jatyr. Búgin biz jaqyndaryn joǵaltqan otbasylardyń qaıǵysyna ortaqtasyp, jaralanǵandar, habar-osharsyz ketkender men zardap shekkendiń tileýin tileımiz, -dep jazdy Rodrıges óziniń X áleýmettik jelidegi paraqshasynda.
24 maýsymda Venesýelanyń soltústiginde, el astanasy Karakastyń batysynda, 39 sekýnd aralyǵynda 7,2 jáne 7,5 magnıtýdaly eki jer silkinisi boldy. Bul 125 jyldaǵy elge tıgen eń qýatty jer silkinisteri boldy. Olardan keıin ondaǵan aftershoktar bolyp, kóptegen ǵımarattyń qıraýyna sebep boldy. Ásirese, halyqaralyq áýejaı jáne eldiń eń iri teńiz porty ornalasqan La-Gýaıra shtaty qatty zardap shekti. Jer silkinisine baılanysty tótenshe jaǵdaı jarııalandy.
