Venesýelada jer silkinisinen segiz kún ótken soń úıindi astynan bir adam qutqaryldy
ASTANA. KAZINFORM – Venesýelada joıqyn jer silkinisinen keıin segiz kún boıy úıindi astynda jatqan er adam qutqaryldy, dep habarlaıdy Anadolu.
Qutqarýshylar La-Gýaıra qalasyndaǵy saýda ortalyǵynyń kúzetshisi, 43 jastaǵy Ernan Alberto Gıl Floresti ǵımarat qırandylarynyń astynan aman alyp shyqty. Ol 24 maýsymda bolǵan joıqyn jer silkinisinen keıin shamamen segiz táýlik boıy úıindi astynda qalǵan.
Halyqaralyq qutqarý toptary birneshe kún boıy nóser jaýyn men qaıtalama jer silkinisterine qaramastan izdestirý jumystaryn júrgizdi. Qutqarýshylar tar sańylaý arqyly zardap shekken adamǵa sý men suıyq taǵam jetkizip, onyń ómirin saqtap qalǵan.
AQSh Geologııalyq qyzmetiniń (USGS) málimetinshe, 24 maýsymda Venesýelada araǵa 39 sekýnd salyp magnıtýdasy 7,2 jáne 7,5 bolatyn eki kúshti jer silkinisi tirkelgen. Osydan keıin elde aýqymdy izdestirý-qutqarý jumystary jalǵasyp jatyr.
Sońǵy málimet boıynsha, apat saldarynan 2295 adam qaza taýyp, 11 myńnan astam turǵyn jaraqat alǵan. Elde jeti kúndik aza tutý jarııalandy. BUU shamamen 50 myń adamdy iz-túzsiz joǵalǵandar qataryna jatqyzyp otyr. Olardyń 30 myńǵa jýyǵy eń qatty zardap shekken La-Gýaıra portty qalasynda bolǵan.
