Venesýelada jer silkinisinen keıin gýmanıtarlyq ahýal kúrt nasharlady
ASTANA. KAZINFORM – Venesýelada bolǵan joıqyn jer silkinisterinen keıin gýmanıtarlyq jaǵdaı kúrt nasharlap, ondaǵan myń adam baspanasyz qaldy, dep habarlaıdy BUU.
24 maýsymda araǵa bir mınýtqa jetpeıtin ýaqyt salyp magnıtýdasy 7,2 jáne 7,5 bolatyn eki jer silkinisi bolǵan. Tabıǵı apattan eń kóp zardap shekken La-Gýaıra shtatynda alty kúnge sozylǵan izdestirý-qutqarý jumystary barysynda úıindi astynan bir bala tiri shyǵaryldy.
Venesýela bıliginiń málimetinshe, jer silkinisi saldarynan 1 943 adam qaza taýyp, 6 400-den astam adam qutqarylǵan. Elde ondaǵan myń turǵyn baspanasyz qalyp otyr. Sonymen qatar myńǵa jýyq ǵımarat, onyń ishinde aýrýhanalar, 400-den astam mektep pen sýmen jabdyqtaý júıeleri qıraǵan nemese qatty zaqymdanǵan.
«Qaza tapqandar sany artqan saıyn gýmanıtarlyq qajettilikter de kúrt ósip keledi», – dep málimdedi BUU Bosqyndar isi jónindegi joǵarǵy komıssary basqarmasy.
BUU Balalar qory (ıÝNISEF) aldaǵy úsh aıǵa 100 myń adamǵa jetetin gýmanıtarlyq kómek jetkizdi. Júktiń quramyna shuǵyl medıtsınalyq kómek jıyntyqtary, qaýipsiz bosandyrýǵa arnalǵan dári-dármek, jańa týǵan nárestelerge qajetti quraldar, sý tazartý jáne saqtaý jabdyqtary, shatyrlar, múgedekter arbalary, sondaı-aq balalardyń oqýyn jalǵastyrýyna arnalǵan oıyn jáne oqý materıaldary kirdi.
BUU Bosqyndar isi jónindegi basqarmasy zardap shekkenderge ýaqytsha baspana uıymdastyryp jatyr. Al BUU-nyń gýmanıtarlyq máselelerdi úılestirý basqarmasy halyqaralyq qutqarý toptarynyń jumysyn úılestirýde. Uıymnyń apat saldaryn baǵalaý jáne úılestirý toby (UNDAC) gýmanıtarlyq kómekti qaı óńirlerge birinshi kezekte jetkizý qajettigin anyqtap jatyr.
«Árbir adamnyń ómiri mańyzdy», – dep málimdedi BUU Bosqyndar isi jónindegi joǵarǵy komıssary basqarmasy.
Vedomstvonyń málimetinshe, ulttyq jáne halyqaralyq izdestirý-qutqarý toptary La-Gýaıra shtatynda jumystaryn jalǵastyryp jatyr.
ıÝNISEF málimetinshe, jer silkinisinen zardap shekken alty shtatta 680 myńǵa jýyq bala gýmanıtarlyq kómekke muqtaj. Sonymen qatar óńirde 600-den astam aftershok tirkelip, turǵyndar úshin qaýip áli de saqtalyp otyr.
«Zardap shekken óńirlerdegi otbasylar taza aýyz sý men medıtsınalyq kómekke asa muqtaj. Kóptegen adam jańa jer silkinisinen qaýiptenip, ashyq aspan astynda túnep júr. Jetkizilgen gýmanıtarlyq kómek asa mańyzdy qajettilikterdi óteıdi, alaıda qazirgi qajettilik budan áldeqaıda joǵary», – dedi ıÝNISEF-tiń Latyn Amerıkasy jáne Karıb basseıni boıynsha óńirlik dırektory Roberto Benes.
ıÝNISEF Venesýeladaǵy tótenshe jaǵdaıǵa áreket etý úshin 52 mln dollar qajet ekenin málimdep, halyqaralyq qaýymdastyqty shuǵyl qarjylaı qoldaý kórsetýge shaqyrdy. Bul qarajat uıymnyń 2026 jylǵa arnalǵan 137,6 mln dollarlyq gýmanıtarlyq josparynyń bir bóligi sanalady. Qazirgi ýaqytta onyń nebári 35%-y ǵana qarjylandyrylǵan.
