Venesýelada jer silkinisinen qaza tapqandar sany 4 333-ke jetti
ASTANA. KAZINFORM — 2026 jylǵy 11 shildede Venesýelada bolǵan eki jer silkinisinen qaza tapqandar sany 4 333 adamǵa jetti. Taǵy 16 740 adam jaraqat alyp, myńdaǵan turǵyn áli de baspanasyz qalyp otyr, dep jazady Anadoly.
Bul týraly Ulttyq assambleıa tóraǵasy Horhe Rodrıges málimdedi.
Rodrıgestiń aıtýynsha, úkimettiń sońǵy resmı esebine sáıkes, ótken aıda bolǵan apattan keıin 86 794 otbasy kómek alǵan.
Ol 6 462 adamnyń qutqarylǵanyn, 856 ǵımarattyń zaqymdanyp, 190-ynyń tolyq qıraǵanyn aıtty.
Bılik 94 ýaqytsha lager uıymdastyryp, onda 18 437 adam ornalastyrylǵan. Sonymen qatar, 17 907 adam áli kúnge deıin turaqty baspanamen qamtamasyz etilmegen.
Rodrıges bılik tarapynan 9 766 tonna azyq-túlik pen 16,6 mıllıon lıtrden astam aýyz sý taratylǵanyn, al 31 193 naýqasqa medıtsınalyq kómek kórsetilgenin qosty.
Onyń sózinshe, zardap shekkenderge kómek kórsetýge 31 837 qyzmetker men 30 197 erikti jumyldyrylǵan. Olarǵa 2 422 halyqaralyq qutqarýshy qoldaý kórsetken.
24 maýsymda Ońtústik Amerıkadaǵy bul elde arasyna nebári 39 sekýnd salyp, magnıtýdasy 7,2 jáne 7,5 bolatyn eki jer silkinisi bolǵan.
Jer silkinisteri aýqymdy qıraýǵa ákelip, el ishinde de, halyqaralyq deńgeıde de keń kólemdi gýmanıtarlyq kómek kórsetý sharalarynyń bastalýyna sebep boldy.
Buǵan deıin Qytaıdyń jer silkinisinen zardap shekkenderge jibergen alǵashqy gýmanıtarlyq kómegi Venesýelaǵa jetkenin jazǵanbyz.
