Venesýelada jer silkinisi qurbandarynyń sany 3 811 adamǵa jetti
ASTANA. KAZINFORM — Venesýelada bolǵan eki joıqyn jer silkinisinen qaza tapqandar sany 3 811 adamǵa jetti, 16 740 adam jaraqat aldy, al myńdaǵan turǵyn áli de baspanasyz qalyp otyr.
Bul týraly Anadoly agenttegi Ulttyq assambleıa tóraǵasy Horhe Rodrıgeske silteme jasap habarlady.
Amerıkalyq X áleýmettik jelisinde jarııalanǵan resmı habarlamada Rodrıges tabıǵı apattan keıin 86 794 otbasyǵa kómek kórsetilgenin atap ótti.
Onyń aıtýynsha, 6 462 adam qutqaryldy, 856 ǵımarat zaqymdanyp, 190-y tolyq qıraǵan.
Bılik 9 603 tonna azyq-túlik pen 9,6 mıllıon lıtrden astam aýyz sý taratty. Sondaı-aq 27 398 adam medıtsınalyq kómek alǵan.
Qutqarý jáne kómek kórsetý jumystaryna 30 076 qyzmetker men 28 992 erikti, sondaı-aq 4 388 halyqaralyq qutqarýshy jumyldyryldy.
Baspanasynan aıyrylǵan turǵyndar úshin 87 ýaqytsha lager ashyldy. Bılik alǵashqy jer silkinisterinen beri 1 102 aftershokty tirkegen.
AQSh Geologııalyq qyzmetiniń dereginshe, 24 maýsymda Ońtústik Amerıkadaǵy bul elde araǵa nebári 39 sekýnd salyp, magnıtýdasy 7,2 jáne 7,5 bolatyn eki jer silkinisi bolǵan.
Apat saldarynan aýqymdy qıraýlar oryn alyp, el ishinde de, halyqaralyq deńgeıde de keń kólemdi gýmanıtarlyq kómek kórsetý sharalary qolǵa alyndy.
Budan buryn Qytaıdyń jer silkinisinen zardap shekkenderge jibergen alǵashqy gýmanıtarlyq kómegi Venesýelaǵa jetkenin jazǵanbyz.
