Venesýelada jazasyn ótep jatqan sheteldikter bosatylady

ASTANA. KAZINFORM — Venesýela bıligi «kóptegen venesýelalyq jáne sheteldik azamatty» túrmeden bosatady. Bul týraly beısenbi kúni Venesýela Ulttyq assambleıasynyń (parlament) tóraǵasy Horhe Rodrıges habarlady, dep jazady Sınhýa.

Rodrıgestiń sózinshe, úkimettiń bundaı sharasy eldegi beıbitshilikti qamtamasyz etýge jáne adamdardyń saıası, dinı, ekonomıkalyq nemese áleýmettik aıyrmashylyqtaryna qaramastan beıbit ómir súrýin qoldaýǵa degen nıetin kórsetedi.

— Bosatý protsesteri dál qazir júrip jatyr. Muny Bolıvarıan úkimetiniń elde beıbitshilikti ornatýǵa degen nıetin bildiretin qadam dep qarańyzdar, — dedi Horhe Rodrıges.

Budan buryn habarlanǵandaı, Venesýelada AQSh-tyń áskerı aralasýy kezinde qajetti qaýipsizdik sharalaryn qamtamasyz ete almaǵany úshin prezıdent Nıkolas Madýronyń kúzet qyzmetine jaýapty general-maıor Haver Markano Tabata qyzmetinen bosatyldy.

Aıta keteıik, arnaıy operatsııa barysynda Venesýela prezıdenti Nıkolas Madýro men onyń jubaıy AQSh-qa evakýatsııalanyp, tutqyndaldy.

Madýro Nıý-Iorkte esirtki saýdasy aıyby boıynsha sot aldynda jaýap berdi.

Venesýelanyń burynǵy basshysy men onyń jubaıy alǵashqy sot otyrysynda ózin kináli dep tanymaıtyndaryn málimdedi.

Nıkolas Madýro qamaýǵa alynǵan sátte kıgen Nike Tech Fleece sporttyq kostıými jahandyq sán trendine aınaldy.