Venesýelada jańa prezıdentti saılaý kúni belgilendi
ASTANA. 10 naýryz. QazAqparat - Venesýelada jańa prezıdent saılanatyn saılaý kúni 14 sáýirge belgilendi, dep málimdedi eldiń saılaý komıssııasy.
Bı-Bı-Sı agenttiginiń habarlaýynsha, juma kúni qaıtys bolǵan Ýgo Chavestiń murageri prezıdenttiń mindetin atqarýshy Nıkolas Madýro bılik partııasynyń atynan daýysqa túspek, al oppozıtsııadan birden-bir kandıdat Enrıke Kaprıles bolmaq.
Ýgo Chaves 5 naýryz kúni uzaqqa sozylǵan qaterli isik syrqatynan kóz jumdy. Ótken jylǵy qazan aıynda ol Kaprılesti jeńip, tórtinshi merzimge saılanǵan bolatyn. Sonda Chaveske saılaýshylardyń 54%-y, al onyń qarsylasyna 44%-y daýys bergen bolatyn.
Chaves tolyq emdelgeni týraly aıtqanmen, densaýlyǵy qaıtadan syr bergen kezde ótken jyldyń jeltoqsan aıynda alǵash ret óziniń murageri týraly aıtty.
Juma kúni ant bergen 50 jastaǵy Madýro Chavestiń solshyl saıasatyn jalǵastyratynyna ýáde berdi. Áleýmettik saýaldamalar boıynsha, aldaǵy saılaýda ol basty ról atqarmaq.
Venesýela saılaý komıssııasynyń basshysy Tıbısaı Lýsenniń aıtýynsha, prezıdentke úmitkerler dúısenbige deıin tirkelýi tıis.
Saılaý kúni jarııalanǵannan keıin oppozıtsııalyq koalıtsııa basshysy Mıranda shtatynyń gýbernatory Kaprıleske daýysqa túsýge resmı usynys jasady. «Taıaýdaǵy saǵattarda men óz sheshimimdi jarııalaımyn», - dedi saıasatker.
40 jastaǵy Kaprıles zańger, ol «ortalyqshyl» jáne «gýmanıst» dep sanalady. Onyń aıtýynsha, ol bıznes pen ınvestorlardyń múddesi úshin áreket etken jáne áleýmettik baǵdarlamalardy damytqan Brazılııanyń eks-prezıdenti Lýısh Inasıo Lýla da Sılvany úlgi tutady.
Chavestiń memlekettik jerleý rásimi juma kúni ótti. Karakastaǵy áskerı murajaıǵa qoıylǵan onyń denesimen qoshtasýǵa mıllıondaǵan venesýelalyqtar keldi.
Madýronyń aıtýynsha, onyń denesi Lenın jáne Mao Tszedýn sııaqty balzamdalatyn bolady.
Oppozıtsııa Madýronyń ant berý rásimine baıkot jarııalap, ony konstıtýtsııalyq emes dep atady.
Olardyń pikirinshe, konstıtýtsııaǵa sáıkes prezıdenttiń mindetin atqarýshy Ulttyq assambleıanyń spıkeri Dıosdado Kabelo bolýy tıis.
Oppozıtsııa sondaı-aq konstıtýtsııada saılaý prezıdent qaıtys bolǵannan keıin 30 kún ishinde ótkizilýi tıis ekeni kórsetilgen dep sanaıdy, al jergilikti OSK tańdaǵan kún bul kezeńmen tustas bolmaı otyr.
Degenmen, Madýro senbi kúni prezıdenttiń mindetin atqarýshy retinde alǵashqy dıplomatııalyq sharalar ótkizdi. Ol Venesýelanyń burynǵy kóshbasshysynyń memlekettik jerleý rásimine kelgen qytaı delegatsııasymen jabyq kezdesý ótkizdi. Sondaı-aq osy kúni ol Nıkaragýa prezıdenti Danıel Ortegamen birge Chavestiń denesi qoıylǵan murajaıda boldy.
