Venesýelada saıası tutqyndarǵa amnıstııa jarııalandy
ASTANA. KAZINFORM – Venesýelada jańa bılik 1999 jyldan bergi kezeńdi qamtıtyn saıası tutqyndarǵa qatysty amnıstııa jarııalady. Ártúrli baǵalaýlarǵa sáıkes, elde saıası baptar boıynsha qamaýda otyrǵan azamattar sany 700–800 adam shamasynda, dep habarlaıdy Euronews.
Venesýelanyń ýaqytsha prezıdenti mindetin atqarýshy Delsı Rodrıges saıası tutqyndardy bosatyp, Karakasta ornalasqan «Gelıkoıd» túrmesin jabý jospary bar ekenin málimdedi.
– Biz 1999 jyldan bastap búginge deıingi saıası zorlyq-zombylyq kezeńin qamtıtyn jalpy amnıstııaǵa qatysty zań qabyldaý týraly sheshim qabyldadyq, – dedi Delsı Rodrıges eldiń Joǵarǵy sotynda sóılegen sózinde.
Onyń aıtýynsha, usynylyp otyrǵan zań jobasy jaqyn arada Venesýela Ulttyq assambleıasynyń qaraýyna engiziledi. Sonymen qatar, «Gelıkoıd» túrmesin áleýmettik jáne sporttyq ortalyqqa qaıta beıimdeý máselesi qarastyrylyp jatyr.
Quqyq qorǵaýshylardyń dereginshe, qazirgi ýaqytta Venesýelada 700-800 aralyǵynda saıası tutqyn bar.
Amnıstııa jarııalaý týraly sheshimge baılanysty pikirler de aıtyla bastady. 2025 jylǵy Nobel syılyǵynyń laýreaty Marııa Korına Machado bul qadamdy AQSh tarapynan jasalǵan qysymmen baılanystyrdy.
– Bul rejımniń óz erkimen qabyldaǵysy kelgen sheshimi emes, – dedi ol.
Onyń aıtýynsha, keıbir tutqyndar 20 jyldan astam ýaqyt boıy qamaýda otyr.
Sonymen birge Marııa Korına Machado Delsı Rodrıgestiń saıası ózgeristerdi iske asyrý úshin qajetti senim men turaqtylyqty qamtamasyz ete almaıtynyn atap ótti.
Al tutqyndardyń otbasylary jaqyndarynyń bosatylýyna úmit bildirgenimen, buryn birneshe ret oryndalmaǵan ýádelerge baılanysty saqtyq tanytyp otyr.
– Biz amnıstııa týraly zań jobasyn abaılap optımızmmen qarsy alamyz, – dep jazdy Foro Penal quqyq qorǵaý uıymy vıtse-prezıdenti Gonsalo Hımıob X áleýmettik jelisinde.
Onyń sózinshe, bul jaǵdaıda amnıstııa qandaı da bir quqyqbuzýshylyq úshin jaýapkershilikti moıyndaý nemese «keshirý» degendi bildirmeıdi.
Venesýelada sońǵy ret amnıstııa 2007 jyly jarııalanǵan. Ol kezde eldiń burynǵy prezıdenti Ýgo Chaves 2002 jylǵy tóńkeriske qatysqandarǵa keshirim jasaǵan bolatyn.
Al 2020 jyly sol kezdegi prezıdent Nıkolas Madýro parlamenttik saılaý qarsańynda 110 raqymshylyq jarlyǵyna qol qoıǵan. Alaıda bul saılaýdy oppozıtsııa boıkottaǵan.
Aıta keteıik, 9 qańtarda Venesýela Ulttyq assambleıasynyń tóraǵasy Horhe Rodrıges sheteldik jáne venesýelalyq kóptegen tutqynnyń jaqyn arada bosatylatynyn málimdegen edi.