Venesýelada raqymshylyq týraly zańnyń kúshi aıaqtaldy
ASTANA. KAZINFORM — Venesýelanyń ýaqytsha prezıdenti Delsı Rodrıges saıası ister boıynsha sottalǵan nemese tergeý astynda bolǵan adamdardy bosatýdy kózdegen raqymshylyq zańynyń qoldanylýy aıaqtalǵanyn málimdedi, dep jazdy Anadoly agenttigi.
El astanasy Karakastaǵy Mıraflores saraıynda sóılegen sózinde Rodrıges bul zańnyń merzimi aıaqtalǵanyn, onyń nátıjesinde kóptegen saıası tutqyndar bosatylǵanyn atap ótti.
Ol raqymshylyqqa ilikpegen nemese onyń aıasynan tys qalǵan tulǵalardyń isteri balamaly quqyqtyq tetikter arqyly qaralatynyn qosty.
Rodrıges usynǵan jáne saıası tutqyndardy jappaı bosatýdy qarastyrǵan raqymshylyq týraly zań jobasy parlamentte 20 aqpanda maquldanǵan bolatyn.
Zań kisi óltirý, esirtki saýdasy, adam quqyqtaryn óreskel buzý nemese áskerı búlik sııaqty aýyr qylmystar úshin sottalǵan tulǵalarǵa qoldanylmady. Onyń maqsaty – 1999 jyldan beri Venesýelada saıası shıelenis kezeńderinde jasalǵan qylmystar boıynsha «jalpy jáne tolyq raqymshylyq» berý edi.
Olardyń qatarynda 2024 jylǵy prezıdenttik saılaý kezinde «saıası astary bar zorlyq-zombylyq» dep tanylǵan áreketter de bar.
Aıta keteıik, Venesýelada osy jyldyń aqpan aıynda saıası tutqyndarǵa amnıstııa zańy qabyldanǵan bolatyn.