Venesýelada munaı baǵasynyń 20 dollarǵa deıin quldyraıtyny týraly boljam jasaldy

ASTANA. QazAqparat - Venesýelanyń munaı mınıstri Eýlohıo del Pıno eger munaı óndirýdi shekteý sharalary qolǵa alynbasa, 2017 jyly qysta otyn baǵasy barreline 20 dollarǵa quldyraıtynyn eskertti. Bul týraly ol 18 maýsymda senbi kúni TASS-ua bergen suhbatynda málim etti.

Osyǵan baılanysty del Pıno qyrkúıekte ótetin OPEK múshe-elderi men táýelsiz óndirýshilerdiń kezdesýinde Karakas osyǵan oraı jańa usynystaryn ortaǵa salatynyn aıtty. Atap aıtqanda, árbir óndirýshi-el úshin óndirýdiń óz dıapazonyn belgileý kózdeledi. 

«Bul usynys munaı óndirýdi ustap turý men elder kvotasy júıesiniń arasyndaǵy mámilelik nusqa bolmaq. Biz qalaı bolǵanda da ortaq sheshim izdestirýdemiz. Bul sondaı-aq OPEK-te buryn qoldanylyp kelgen baǵa dıapazonynan basqasha bolady», - dep túsindirdi del Pıno.

Mınıstr sondaı-aq OPEK naryqtyń  munaı baǵasyna baqylaý jasaýyna jol bermeýi tıis, dep atap ótti, óıtkeni bul resýrs qalpyna kelmeıdi. «Munaı qymbattap barady. Munaı óndirý barǵan saıyn ınvestıtsııalardy kóbirek quıýdy talap entýde. Munaı baǵasynyń qalaı-solaı jasaqtalýy múmkin emes. Munaıdy bul deńgeıden tómen baǵamen satýǵa bolmaıdy», dedi ol.

2016 jyldyń basynda Reseı álemdik naryq turaqtanýy úshin munaı óndirý ósimin  qańtar-aqpandaǵy deńgeıde ustap turýǵa ázir ekenin málimdedi. Alaıda Reseıdiń jáne OPEK músheleriniń qatysýymen ótken munaı derjavalary ókilderiniń kezdesýinde bul jóninde ýaǵdalasýdyń reti kelmedi.

Saýd Arabııasy Irannyń qatysýynsyz qandaı da bir qujattarǵa qol qoıýdan bas tartty: Iran Islam Respýblıkasynyń ókilderi Dohaǵa kelgen joq.